Na celebracion di e di 25 aniversario di e instituto pa cuido mental na Aruba, PAAZ, Minister Arthur Dowers a hiba palabra den su capacidad di Minister di Husticia, pero mas ainda e tabata contento di por comparti den e comemoracion importante aki como un colega orguyoso di esnan cu ta brinda cuido y ayudo na e clientenan di PAAZ. Minister Dowers a traha como enfermero na PAAZ y tambe a fungi pa un tempo den e puesto di interim manager di e institucion. E mandatario a comenta cu e ta un satisfaccion hopi grandi pa wak asina hopi di e coleganan cu el a traha cu nan ta trahando ainda na PAAZ. E dedicacion y pasion den nan trabao ta resulta den bon cuido y esaki ta refleha ora wak e clientenan di e institucion ta mustra berdaderamente conteno y hopi bon cuida, sr. Dowers a remarca. E tipo di cuido cu PAAZ ta brinda ta hopi diferente di loke nos ta custumbra cun’e, sr. Dowers a enfatisa, añadiendo cu esun cu ta brinda cuido ta hopi mas cerca di e hende y e relacion hopi biaha ta uno mas largo tambe cu esun cu ta tuma luga den un hospital. Minister Dowers a corda ariba tempo cu e tabata traha na PAAZ y cu tabatin hopi discusion ariba e futuro di psiciatria na Aruba cu e psiciater y psicologonan. Tabatin hasta diferente comision cu a traha ariba e topico. Sr. Dowers a comenta cu e ta sinti cu e desaroyo di cuido mental na Aruba no a bay mes lihe cu e desaroyo di cuido general y cu tin trabao pa haci sigur den e ramo aki y e ta spera cu den e añanan cu ta bin lo tin mas focus ariba cuido mental y cu PAAZ lo tuma e posicion lider den e proceso aki. “E momento t’ey pa duna hopi mas contenido na cuido mental na Aruba,” Minister Dowers a bisa. El a pidi pa esnan cu ta traha na PAAZ bira e embahadornan pa pusha esaki y logra pone ariba agenda mescos cu den pasado a pasa cu Centro Dakota, cu danki na PAAZ e centro aki pa cuido di adictonan di droga a bira un realidad. Asina tin mas iniciativa valioso cu a tuma luga pa medio di trahadornan di PAAZ, manera e opcion pa “dagbehandeling” cu di berdad a duna resultadonan positivo y ta yuda hendenan cu mester di guia y extra ayudo. “E iniciativanan haci ta asina grandi cu mester ta hopi orguyoso, hopi desaroyo positivo a tuma luga, e caminda ta habri pa mas…E institucion tin su raisnan bon ancra den e sociedad,” el a enfatisa. Minister Dowers a bisa cu PAAZ ta un centro di cuido y guia cu hopi capacidad, hopi persona dedica y cu amor pa e trabao. E caminda ta habri pa mas desaroyo positivo y e titular di husticia a expresa cu e ta kere cu PAAZ por tuma e iniciativa y uni forza cu otro gruponan cu ta brinda cuido mental na Aruba y asina berdaderamente lo tin un cuido bon organisa, manera cu tur hende merece.

Minister di Husticia y Enseñansa, mr. drs. Arthur Dowers a declara dialuna cu despues di a ricibi e carta caba di Bisdom cu aprobacion pa haci algo pa alivia e situacion deteriora di Scol Frere Bonifacius, awo ta wardando pa SKOA bin cu un proposicion.

Minister Dowers a splica cu e no kier mustra autoritario y yega drenta den maneho di e scolnan pasobra e ta kere completamente den un proceso democratico, e ta desea pa SKOA bin cu sugerencia y hunto nan por yega na un solucion pa e scol. El a añadi cu e ta spera y ta parce cu nan lo por sinta e siman aki pa tuma algun decision hunto tocante Frere Bonifacius.

Nos sa cu e condicion di e scol ta malo, sr. Dowers a comenta. E mandatario a splica cu el a bay wak e scol, e tin tur e potretnan cu su team a saca durante di e bishita, el a papia cu tur hende, incluyendo e cabesantenan y e proceso aki tin e atencion di dje y su team y tin di hopi tempo, mas of menos un aña caba andando.

Frere Bonifacius ta un scol catolico y no un scol publico unda cu e minister ta responsabel directamente pa maneho diario, e mandatario a añadi.

Sr. Dowers a bisa cu e scholenbestuur tin hende ta traha nan raportnan pa nan y den e raportnan aki a indica cu no tin peliger directo pa e muchanan. Den e caso di De La Salleschool unda cu Minister Dowers mes a dicidi cu e hobennan mester a muda casi di biaha tabata pasobra ey tabatin peliger directo pa e alumnonan. E criticanan tabata hopi y insistente sin cu hendenan tabata consciente di e situacion real y cu e alumnonan y maestronan imposiblemente por a sigui den e edificio cu hasta tabatin parti di e vloer di e di dos piso debilita.

Den caso di Frere Bonifacius, Minister a expresa cu e ta spera di por sinta cu e scholenbestuur e siman aki ainda. No ta facil haya na Aruba luganan cu por acomoda un scol completo, pero si ta purba pa recrea e ambiente apropia pa e alumnonan unda cu nan mester muda. Esaki ta tanto e meta di Sr. Dowers como esun di SKOA y e ta spera cu lo por haya un solucion acceptabel hopi lihe.

Despues di e atraco na Gandelman Jewelers na Renaissance Mall diasabra, Minister di Husticia y Enseñansa Arthur Dowers tabata na e sitio y a papia cu e trahadornan, e doño y recherche presente. “Loke mi ta haya lamentabel ta cu na momento cu e tipo di cosnan aki ta pasa, e dolor cu nan (e atracadornan) ta haci na hende. E ta un impacto grandi ariba e ser humano ora bo bira victima di un acto asina,” e mandatario a comenta.

El a bisa cu no tin duda cu polis a haci y ta haciendo un bon trabao cu nan investigacionnan y cu esun aki tambe. “Mi no ta kere cu por haci e pregunta “unda polis a keda?” na momento cu hende hinca den nan cabez cu nan kier bay horta algo, nan ta haci’e, ” el a enfatisa, añadiendo cu no ta Aruba so, y no ta awo so, pero pa hopi aña y den tur comunidad mundialmente tin cu trata cu hendenan cu ta horta y haci cosnan contra ley. “Bo tin hende den comunidad cu a desaroya nan mes y a desaroya un mente caminda nan ta haci tipo di cosnan asinaki fo’i sla,” el a remarca. Tin hende tambe ta bin fo’i otro camindanan y ta comete actonan contra ley aki, e minister a comenta.

E area unda e atraco a tuma luga conoce hopi vigilancia, camara di siguridad y ademas, polis ta pasa den e area cu frequencia, pero no ta kita cu hende no lo tuma un chance, Minister Dowers a remarca.

“Nos Cuerpo Policial ta prepara. Nos tin un Cuerpo Policial bon equipa cu ta soluciona hopi di e problemanan aki y ta traha preventivo,” Minister Dowers a bisa. E atracadornan por conta cu husticia lo baha duro ariba nan, nos lo haya nan y nan lo wordo condena pisa pa esaki, e titular di husticia a afirma.

Polis ta trahando preventivo y ta bay traha ainda mas preventivo,pero esaki lo kiermen cu tambe e caracter di nos pais lo ta cambiando, sr. Dowers a bisa, dunando e ehempel di con e banconan ya pa algun aña ta funcionando cu hopi extra siguridad.

Diabierna mainta na Bestuurskantoor, Minister di Husticia y Enseñansa, Arthur Dowers a introduci e unidad K-9 di Aruba y a entrega e certificadonan na e team di instructornan di cacho di polis cu a gradua e siman aki. E instructornan y nan cachonan a haci examen y gradua diahuebs y awor ta certifica segun e reglamento pa cacho di vigilancia di Pais Aruba. Esaki ta prueba cu e instructor por maneha y tin control over di su cacho y nan ta traha bon hunto. Durante un bishita di trabao di Minister Dowers na Hulanda na 2010, el a bishita e prestigioso unidad di cachonan specialisa di Cuerpo Policial di Hulanda, unda cu e idea a nace pa tambe establece un bon unidad K-9 na Aruba. “Esaki a wordo haci cu e vision pa den futuro crea na Aruba mes un centro di expertisio den e ramo aki cu lo duna servicio na region di Caribe y kisas hasta mas leu,” Minister Dowers a comenta. Pa Aruba e Unidad K-9 ta un recurso hopi importante pa, entre otro, yuda cu buskeda y cu “control di multitud” y sigura cu tur hende por sali disfruta di eventonan y actividadnan den tur trankilidad. E instructornan y cachonan cu a gradua di e basisopleiding ta V.C., R.L., R.H., D.N. y B.v.L y awor nan lo por subi caya pa traha, tanten cu e opleiding ta sigui. E team ta wordo encabeza pa Chef Unit Honden, sra. Fleur Wing-Tromp, ken tambe ta Chef di Districto di Noord. Durante e siguiente fase di nan entrenamento, e cachonan lo siña tambe con pa busca y indica cu tin droga of arma di candela. Nan areanan di trabao poco poco lo wordo expande y lo por pidi nan asistencia entre otro den KIA, den area di waf, pero tambe durante calamidadnan, incidentenan pisa y na eventonan unda cu tin aglomeracion di hende. E cachonan di vigilancia por wordo instrui pa ataca ora cu mester controla un multitud, pero tambe por efectua buskeda di hende ora por ehempel un ladronicia tuma luga. E seleccion di e cachonan, e instructornan, como tambe e entrenamento a keda den man di sr. Dick van Leenen, un experto cu hopi aña di experiencia. Na Hulanda sr. Van Leenen tabata hefe di e centro di keuring di cacho di polis y chef di e unidad di cacho specialisa. E centro Hulandes unda Aruba a adkiri su cachonan ta entre e institucionnan mas prestigioso di mundo, unda cu Estadonan Uni di Merca y Russia, como tambe paisnan asiatico ta cumpra na cachonan, segun sr. Dick van Leenen. E unidad K-9 di Aruba ta consisti di 6 cacho, di cual Rocco, Vito, Marco y Atos ta cacho di vigilancia of “surveillancehonden”, Aran, cu ta specialisa den buskeda basa ariba holor di hende (speurhond menselijke geur) y vigilancia y Britt, e cacho specialisa den busca y detecta droga, arma y placa di candela. Britt ta e prome cacho cu a wordo tuma den servicio. Minister Dowers a presenta e certificadonan na a graduadonan den presencia di ComisarioTrudy Hassel y hunto cu Korpschef Dolfi Richardson a presenta e Brigada di Cacho na prensa y comunidad di Aruba.

Minister di Husticia y Enseñansa, mr. drs. Arthur Dowers a bishita Universiteit van Amsterdam durante su bishita di trabao na Hulanda na December. Aki, e mandatario a reuni cu “TIER”, Top Institute for Evidence Based Education Research, encuanto e posibilidadnan pa organisa cursonan pa educadornan na Aruba. Esaki ta den cuadro di Minister su vision pa provee miho oportunidadnan y cuido pa nos maestronan.

TIER ta un centro di  investigacion pa Evidence Based Education y tin tres partner, Universiteit Maastricht, Universiteit van Amsterdam y Rijksuniversiteit Groningen. TIER tin como meta pa contribui na e mehoracion di e calidad di enseñansa na Hulanda – y awor tambe na Aruba – pa medio di promove un acercamento basa ariba evidencia (evidence based) como un principio pa guia strategia, procedura y training den enseñansa.

E sistema tin como base e desaroyo di intervencionnan efectivo, tanto den costo como den nan resultado, cu ta basa ariba resultadonan di sondeo cientifico y comprension cientifico di causa y efecto.

Expertonan di TIER a expresa cu nan ta hopi interesa pa traha hunto cu Universidad di Aruba pa organisa un curso ariba tereno di Evidence Based Education y lo ta na Aruba otro siman pa cuminsa traha ariba e realisacion di e proyecto aki hunto cu Minister Dowers y e universidad.

 Openbare Basisschool De Veldrakker na Nieuwegein, Hulanda, a ricibi Minister di Husticia y Enseñansa di Aruba cu hopi entusiasmo diahuebs. E cabesante, sra. Jeannet van Woezik ta splica cu e tabata conoce beleidsmedewerker di Ministerio di Enseñansa, sr. John Hessen di tempo cu nan a traha hunto ariba un proyecto y e ta hopi contento cu Minister Dowers y su delegacion por a bin bishita su scol.

Minister Arthur Dowers a haya un bon splicacion di con e scol ta funciona y pakiko e scol ta asina exitoso.

De Veldrakker ta ofrece les di Ingles na su alumnonan for di kleuterklas, Groep 1. E les nan ta cuminsa cu un biaha pa siman mey ora cual ta concentra ariba siña papia Ingles y asina cu e alumno ta siña scirbi y lesa den Groep 3 (Klas 1) e ta siña Ingles tambe. Ora cu e alumno caba Klas 6, ya e tin conocemento amplio y un bon base di e idioma Ingles.

E ICT begeleider, Johan van Wijk , cu ta traha na 4 scol den e area ta comenta cu De Veldrakker ta diferente pasobra e muchanan ta haya “overblijf” y Traimerdia na e mes scol. E programa ta asina bon desaroya cu e mayornan mes ta ricibi entrenamento y ta traha na e scol atardi. Sr. Van Wijk ta comenta cu e programa ta hopi popular y exitoso pasobra mayornan ta sinti cu nan yiunan ta na un luga sigur y ta wordo bon cuida.

E otro factor cu sr. Van Wijk ta menciona ta cu e scol ta haci basta uso di computer. Den e kleuternan hopi menos, pasobra nan ta considera e desaroyo social di mucha mas importante, y tin enfasis ariba comunicacion cu otro y hungamento. Den cada kleuterklas tin un computer y no tin plan pa expande e cantidad aki tampoco. Den Klas 1, ora e muchanan ta cuminsa siña lesa nan ta cuminsa bay les di computer di 15 minuut pa mey ora.

E scol tambe ta usa un leerlingvolgsysteem, un sistema cu ta wordo usa na algun scol na Aruba, unda cu ta sigui e progreso y desaroyo di un mucha for di su prome aña di scol.

click e link aki pa scucha e entrevista cu minister Dowers y Minister Arrindell

int_minjo_bezoek_min_arrindell_091211_

min_rhoda_arrindell_sxm_091211

Un delegacion di Aruba, encabesa pa Minister di Husticia y Enseñansa, mr. drs. Arthur Dowers ta na Port of Spain, Trinidad y Tobago pa atende e di Tres Reunion di Ministernan Responsabel pa Siguridad Publico den Estadonan Americano (MISPA III). E reunion di dos dia a wordo organisa pa OAS, e Organisacion di Estadonan Americano.

Loke a resalta durante e reunionnan tabata e enfasis cu e representantenan di e paisnan a pone ariba e importancia di tin polisnan cu ta integro; e integridad di e miembronan di cuerpo policial, Minister Dowers a comenta. Tambe a papia basta di e relacion di polis cu e comunidad y e autoridad di polis, como tambe e confiansa di e ciudadano den miembronan di cuerpo policial. Esaki ta puntonan cu particularmente tin e atencion di Minister Dowers y e ta continuamente atento ariba e factornan importante aki.

Durante e congreso di OAS, Canada, Colombia, Venezuela, Trinidad y Tobago y Chile a duna diferente presentacion di e funcionamento di nan cuerponan policial y criminalidad.

E reunion inter-ministerial a trata hopi otro topico, entre otro diferente raport manera e estudio di factibilidad ariba formanan pa fortalece training y enseñansa pa personal responsabel pa siguridad publico den nos region. Tambe a presenta un raport cu un compilacion di “best practices” y experiencianan den area di maneho policial y cooperacion internacional.

Durante tres sesion interesante a discuti modernisacion di e institutonan policial, apoyo pa profesionalisacion di polis y training y con pa fortalece cooperacion pa cu sistemanan di informacion di polis y mas uso di tecnologia.

Diaranzon mainta Juez a dicta sentencia den e caso cu e grupo di doñonan di e trailernan cu ta wordo usa na diferente scolnan, na Centro Washington y otro localidadnan pa duna les na muchanan di scol a lanta contra Minister Dowers. E caso aki como tambe e caso principal cu mester tuma luga ainda ta un intento pa stop un Ministiele Beschikking (MB) cu Minister Dowers tabata trahando ariba pa huur di localnan modular pa reemplasa e trailernan. E localnan modular lo a bira propiedad di gobierno despues di 5 aña di huur.

Minister di Husticia y Enseñansa, mr. drs. Arthur Dowers a duna un declaracion na telefon pa prensa local despues di e sentencia, ya cu e no ta na Aruba na e momentonan aki.

El a bisa cu e no a lesa e sentencia ainda, pero el a tuma contacto cu su abogado, kende a informe di e contenido. E sentencia no ta bisa nada entorno di e caso, juez a puntra solamente pa no ehecuta e MB na e momentonan aki te ora cu e caso principal bay dilanti.

“Mi ta kere esaki ta un sentencia gewoon pa gana tempo te ora e otro caso por tuma luga,” e mandatario a bisa.

E situacion ta completamente diferente cu na momento cu e MB a wordo traha, pues nos mester evalua e situacion cu a aparece na momentonan aki, Minister Dowers a añadi. E sentencia aki no ta bisa nada over di henter e procedura, el a remarca.

E MB ta specificamente pa reemplasa sierto producto cu ministerio di enseñansa no ta contento cun’e.

Minister Dowers a enfatisa cu na mas di un ocasion el a bisa cu a duna tur hende oportunidad pa entrega un oferta y no ta manera e doñonan di trailer cu ta trece mentira padilanti, bisando cu nan no a haya un chance pa participa.

“Nos ta sigui busca solucion p’e problema aki, sr. Dowers a remarca. Mester corda cu gobierno tin e repsonsabilidad pa no keda paga innecesariamente pa cosnan cu no ta necesario, el a conclui.