Dialuna den Parlamento a trata e cambio di ley pa e sala di slotmachine na Aeropuerto Internacional Reina Beatrix, cual proceso a envolve Minister di Husticia Arthur Dowers, Minister di Transport Otmar Oduber y Minister di Finansa Mike de Meza.

Minister Dowers a splica cu aunke cu e ley cu ta regarda derecho di desaroya y opera casino ta resorta bao di maneho di husticia, su dos coleganan tambe tabata envolvi den e proceso di cambio di ley, como cu esun cu anteriormente a opera e slotmachinenan tabata Lotto pa Deporte y e futuro operador – cu e cambio di ley – lo ta aeropuerto.

Un cos hopi importante pa realisa ta cu e ley aki nunca mester a pasa. Esaki ta pasobra Raad van Advies a conseha tempo cu el a wordo pusha pa e partido MEP, cual tabata na manda e tempo ey, cu e ley no ta sirbi, e ta hopi bruha y contradictorio, e mandatario a splica.

Minister Dowers a bisa cu ademas e meta di Lotto no tabata pa opera casino y consecuentemente nan a perde un gran cantidad di placa cu por a bay den deporte.

E parti mas grave, Minister Dowers a subraya, ta cu e ley a wordo lanta tin “toezichten”, pues sin e control esencial di parti di husticia.

Parlamento ta tratando e cambio di ley pa asina haci posibel pa aeropuerto mes por tin e derecho pa habri y opera e sala di slotmachine. Minister Dowers a enfatisa cu na momento cu pasa e ley nobo y e sala di slotmachine por habri, aeropuerto mester tene bon nan cuenta cu e control di esaki lo resorta bao di husticia y loke ta bira e “gaming board”, manera tur otro casino na Aruba. No lo haci ningun excepcion y tur hende mester cumpli cu tur regla stipula pa FATF y e rekisitonan y mester paga gobierno e parti cu gobierno tin derecho riba dje.

Dialuna mainta presidente di parlamento a suspende un reunion publico caminda Minster Dowers tabata participe na dje, pa ricibi  obispo di Trinida & Tobago Nicola Girasoli. E obispo a realisa un bishita di cortesia cual tabata uno ameno,  obispo Luis Seco di obispado di Willemstad a compaña su colega durante e bishita aki

Riba 16, 17 y 18 di mei Aruba ta anfitrion di un conferencia cu tin como tema central e idioma Hulandes como idioma stranhero. NVTiC, cual ta “Nederlands als Vreemde Taal in het Caribisch gebied” ta e prome reunion grandi entre e delegadonan procedente di e paisnan den Reino, esta Aruba, Boneiro, Corsou, Saba, Sint Eustatius y Hulanda, plus Surnam. E discusion central ta e desaroyo di un miho forma, metodo y strategia pa duna les di e material Hulandes den nos region.

Durante apertura di e conferencia diahuebs anochi na Westin Resort, unda cu di biaha a cuminsa e prome tanda di discusion, Minister Dowers a cuminsa su discurso cu e declaracion: “Mi heroenan ta sinta mi dilanti.” E mandatario a splica cu p’e e conferencia aki ta extra special, pasobra e ta reuni e personanan cu ta heroenan den enseñansa, den e sentido cu nan lo provee e base pa haci enseñansa mas accesibel pa nos hobennan.

E conocemento, experiencia y experticio cu ta wordo intercambia y comparti durante e conferencia lo sirbi como e fundeshi riba cua nos studiantenan lo construi nan futuro. E conferencia aki ta un factor importante den e proceso cu lo resulta den un programa didactico complementario cu ta establece e conexion pa siña y instrui e material Hulandes. E programa ta dirigi na scolnan basico y e prome y di dos aña di scol secundario.

Minister Dowers a expresa cu e grupo di experto aki ta traha na beneficio y servicio di nos hobennan y e programa cu nan produci finalmente lo yuda nos studiantenan cu nan transicion academico ora nan bay studia na Hulanda, pero hasta prome cu esey e lo yuda den nan progreso y desaroyo na scol for di cuminsamento, di momento cu nan cuminsa siña Hulandes den eerste klas di scol basico.

Miho dominio di idioma ta conduci na exito den enseñansa y den bida, Minister Dowers a subraya. E trabao cu ta wordo haci pa e grupo di heroenan aki ta di sumo importancia pa e prestacion di nos hobennan na scol y e futuro di nos comunidadnan.

E conferencia NVTiC a wordo organisa pa SPLIKA – un organisacion regional cu a gana e bid pa guia e desaroyo di e programa di enseñansa di e idioma Hulandes pa islanan BES, cu asistencia di NTU – Nederlandse Taal Unie y Departamento di Enseñansa di Aruba.

E bienestar di nos muchanan y e situacion di nos muchanan pa loke ta trata derecho di mucha ta central den e rapport di UNICEF di cual e resultadonan a wordo presenta diahuebs mainta. E rapport ta resultado di informacion oficial di diferente instancia y combersacionnan cu representantenan di UNICEF a hiba na Aruba cu instancianan gubernamental, organisacionnan no gubernamental (NGO), profesionalnan cu ta traha y trata cu mucha y hoben, como tambe miembronan di nos comunidad.

Minister Dowers a keda satisfecho cu e resultado di e rapport, cual ta mustra cu den tur area na Aruba tabatin mehoracion compara cu e rapport anterior. Mayoria di e areanan menciona den e rapport ta cay bao maneho di un of tur dos di e ministerionan di Minister Dowers. “E rapport en general ta positive y por mira mehoracion riba tur tereno pa loke ta trata bienestar di mucha y hobennan na Aruba,” Minister Dowers a subraya.

Semper tin areanan cu mester atencion, segun e mandatario, pero tur parti di mundo esaki ta e caso. Unda cu ta concerni cuido, siguridad y desaroyo di mucha, como tambe percura pa nan derechonan ta salvaguardia, mester tin atencion continuo y mester monitorea e situacionnan constantemente, Minister Dowers a splica.

E rapport positivo di UNICEF ta resultado di e forma proactivo cu gobierno ta trahando y tambe ta danki na con bon nos NGOnan ta funcionando, Minister Dowers a expresa.

Minister Arthur Dowers a menciona diferente factor cu ta contribui na e bienestar general, desaroyo y progreso di e hende hoben na Aruba, cual tambe ta percura pa e derechonan di mucha ta salvaguardia.

Leerplicht, cual a wordo introduci bao maneho di Minister Dowers, sigur ta un di e instrumentonan importante den e proceso pa sigura cu muchanan ta haya apoyo pa loke ta trata nan derecho pa un educacion. Na Aruba no tabatin hopi mucha cu no ta bay scol, pero si mester sigura cu nan ta bay scol manera mester ta pa nan por ricibi e enseñansa cu nan merece.

Un otro factor ta e cambionan den ley penal, unda cu un hoben no necesariamente mester bay cera na prizon ora cu e comete un fayo, pero por ricibi un castigo alternativo.

Actualmente tambe ta bezig ta traha riba e ampliacion di Ortopedagogisch Centrum pa acomoda un departamento nobo, unda cu e hoben no lo bay cera na KIA, pero lo bay biba na e centro cu ta ofrece un situacion unda cu e hoben su libertad ta limita, pero no ta wordo kita por completo.

Finalmente, Minister Dowers a splica cu tin un proyecto mas cu ta trahando ariba, cual ta e “wijkschool”. Esaki lo presenta un situacion beneficioso pa e hoben di mas of menos 16 aña kende ta haya cu pa un of otro motibo e no ta pas den enseñansa tradicional mas. E hoben por acudi na e wijkschool y sigui aki cursonan dirigi na siña un vocacion cual ta wordo presenta na un forma no-tradicional.

Minister Dowers a keda satisfecho cu e rapport di UNICEF y ta trahando tur dia pa sigui mehora e situacion di nos muchanan y hobennan, kende merece tur oportunidad pa desaroya sanamente pa un futuro bon y stabiel.

Diaranson mainta, minister Arthur Dowers a haci un bishita di cortesia na Sint Anna school na Noord.

Aki e titular encarga cu enseñansa a combersa un rato cu e directora señora Myrilla Hsing-Raven di e scol menciona pa informa su mes di con e situacion ta despues di e reapertura.

Segun e señora Hsing-Raven cu e muchanan ta sumamente contento cu nan scol nobo y tur dia nan ta gaba con bunita y moderno nan scol a keda. Un di e comentarionan hopi scucha desde cu nan a muda bek na e scol ta, cu porfin e scol tin un baño bunita y decente.

E directora na su turno, tambe a desea pa minister Dowers pasa wak personalmente, con e klasnan di entre otro, handenarbeid, computer y biblioteca tabata kedando desde cu nan a muda na St. Anna school bek.

No por keda sin menciona cu e scol basico aki na Noord, ademas di a keda hopi bunita y moderno, cu e ta un scol completo, den e sentido cu e tin tur e facilidad necesario pa brinda un nivel di educacion hopi halto.

Durante e ocasion di e bishita di cortesia aki, minister Dowers tambe a haci entrega di un corant dedica specialmente na St. Anna school. E contenido di e corant aki cu ta hiba e nomber di ‘Mi Scol, Mi Futuro’ ta relata graficamente con e estado di dicho scol tabata antes y con esaki ta awor aki, como tambe e ta ilustra cara di felicidad di tur e alumno y docente riba nan prome dia bek na dicho scol. Cada mucha y docente a ricibi un ehemplar pa nan tin esaki como recuerdo. Un di e comentarionan cu minister Dowers a haci durante su bishita tabata, cu loke ta yena su persona cu hopi satisfaccion pa continua cu e trabou cu e la haci como minister, ta na momento cu e mira e sonrisa riba cara di nos muchanan despues cu nan scol a wordo bon drecha.

E siman aki rond Aruba studiantenan ta cuminsando cu nan examennan final. Minister Arthur Dowers ta desea tur nos hobennan hopi exito, pasenshi y forsa durante e periodo asina importante aki y ta comparti e siguiente mensahe cu tur nos examenklassernan:

Nelson Mandela a bisa “Educacion ta e arma mas poderoso cu bo por uza pa cambia mundo” y cu e pensamento aki mi ta desea pa boso cuminsa boso periodo di examen. Boso tur – sin excepcion – tin un talento, algo special, cual hunto cu un bon educacion ta brinda boso e oportunidad tur dia pa haci un diferencia positivo den boso mes bida y den bida di un conciudadano, bo famia, un bario, un comunidad completo, nos mundo. Tuma e reto pa hacie bo mision personal pa studia cu entusiasmo, traha cu pasion y uza bo educacion y bo talento semper na un forma positivo y proactivo.

Sea cua sea e scol cu bo ta cabando e aña academico aki – MAVO, HAVO, VWO of un scol di educacion profesional manera EPB of EPI – semper haci bo best y pensa cu positivismo cu esaki no ta un final, pero un comienso den bo trayectoria di “lifelong learning”.

Mi ta desea tur examenklasser hopi exito cu nan examennan, hopi pasenshi pa domina momentonan di nerviosismo y forsa pa sigui cu determinacion y dedicacion te na boso ultimo examen.

Corda drumi y come bon, y no lubida di programa momentonan di descanso durante cu bo ta repasa bo materianan pa bo mantene un bista fresco te na bo ultimo examen.

Ta mi deseo di wak boso tur, cu sonrisanan grandi riba boso cara y lagrima di alegria ora cu nos celebra boso resultado positivo y graduacion na final di e aña escolar 2012/2013.

Un biaha mas “Hopi Exito!” y corda semper cu bo futuro ta den bo man!

Durante Siman di Enfermeria EPI Unidad Salubridad y Servicio, cual ta percura pa e educacion di nos futuro enfermeronan, a tene un biaha mas su tradicional symposium, e aña aki cu enfoke riba Alzheimer’s Disease.

Minister di Husticia y Enseñansa Arthur Dowers na apertura di e evento, cual a tuma luga den e auditorium na EPI, a expresa palabranan di elogio pa e tremendo organisacion di parti di e studiantenan. E mandatario a bisa cu durante su añanan como minister el a nota un adelanto enorme den e presentacion di e studiantenan y cu e forma cu nan ta bay eherce nan profesion ta refleha den e organisacion cu nan ta presenta na eventonan asina.

E ta considera e topico cu e studiantenan a scoge uno hopi importante y ta esencial pa tene e tema di Alzheimer’s Disease central como cu esaki no solamente ta influencia e futuro di cuido, pero tambe ta bin cu cierto costonan cual ta haci e discusion mas dificil ainda. Minister Dowers a expresa cu e ta spera cu como profesional den futuro e studiantenan lo contribui tambe na un forma activo na e discusionnan tocante reparticion y calidad di cuido. E ta sumamente importante pa tin discusionnan aki pa percura cu nos pashentnan ta haya e cuido optimal y na nivel di un sociedad civilisa, Minister Dowers a añadi.

E tema di Alzheimer’s Disease ta uno sumamente complica. E titular di enseñansa e expresa cu manera e studiantenan a organisa nan symposium, envolviendo esnan pionero den e area di conscientisacion manera Sr. Escalona, y profesionalnan den e trato y cuido di e pashent lo duna nan sigur un bon bista riba topico actual y importante aki.

Minister Dowers a comenta cu a experencia pa hopi aña e grito pa profesionalisacion den e ramo di enfermeria. “Mi ta kere cu awe mundialmente ta wordo reconoci cu enfermeria ta un profesion cu tin un base solido di profesional,” Minister Dowers a subraya. E mandatario ta lamenta si cu no tur ora tur persona den e profesion ta duna e maximo di nan mes pa logra e nivel di calidad cu ta desea pa e gran mayoria di enfermeronan, kende ta profesionalnan serio y dedica.

Minister Dowers a encurasha e studiantenan pa pone enfasis riba calidad, sea bon prepara y motiva. Concluyendo su discurso Minister Dowers a pidi e studiantenan y profesionalnan presente pa uza e Siman di Enfermeria como un oportunidad pa refleha riba nan profesion y con pa sigui profesionalisa y eleva calidad di enfermeria.

Minister di Husticia y Enseñansa Arthur Dowers a cuminsa su carera profesional como enfermero y semper ta sigui cu hopi interes desaroyonan den e ramo aki. Como e mandatario encarga cu enseñansa el a participa e aña aki tambe na e apertura di Siman di Enfermeria, unda el a comparti su pensamentonan tocante desaroyonan y futuro di enfermeria na Aruba.

Minister Dowers a bisa cu un punto cu mester sigur mas discusion entre e profesionalnan den e ramo aki ta e futuro di e profesion, cual ta den desaroyo continuo. E profesion aki no ta cambiando solamente basa riba loke ta pasa pafo di enfermeria, pero factornan interno y den e comunidad tambe ta hunga un rol, segun e titular di enseñansa. E desaroyo di tecnologia ta sigur un di e elementonan mas determinante ora ta considera e cambionan den e profesion. E rol por ehempel di e enfermero ora ta papia di expectativa di bida di e ser humano ta uno importante y esaki tambe ta cambia cu desaroyonan nobo den nos sociedad y avancenan tecnologico.
Minister Dowers ta di opinion cu enfermeronan no por wordo mira mas den nan posicion huridico como un extension den e profesion medico, manera ta e caso na Hulanda tambe, pero e enfermero mester wordo reconoci totalmente como un profesional. E mandatario ta argumenta esaki entre otro for di punto di bista cu e profesion a conoce hopi specialisacion cual ta haci posibel pa e enfermero traha na un forma mas independiente banda di e dokter, kende ta prescribi e tratamento cu e enfermero ta ehecuta.

E punto di salida ta cu na momento cu e persona a studia pa bira enfermero y ta “bekwaam”, o sea cualifica, pa haci algo, e mester por hacie tambe y ta wordo teni na reglanan profesional educacional cu e mester cumpli cune pa asina garantisa calidad di servicio na e pashent.

“Esey nos mester bringa p’e como grupo profesional, pues pa garantisa cu e responsabilidad y consciencia di e enfermero t’ey continuamente…cu e mester percura pa e mantene un cierto nivel di calidad pa garantisa e servicio cu e ta brinda,” Minister Dowers a bisa.

E posicion huridico di e enfermero mester ta bon estableci y e enfermero mester ta consciente di loke e ta haci, dicon e ta hacie y kico e consecuencianan ta ora cu e hacie bon of no bon, e mandatario a conclui bisando.

Diamars merdia minister di Husticia y Enseñansa Arthur Dowers,  tabatin e honor di entrega sra. Anne-Marie Proveyer-Groot e decreto gubernamental caminda ta stipula cu e ta e director  di departamento di enseñansa Aruba.  Sra. Proveyer ta ocupando e posicion di directora interino di e departamento ya pa varios aña. Despues di a pasa door di un proseso riguroso di solicitud y seleccion, finalmente awe sra Anne-Marie Proveyer-Groot a ricibi su decreto gubernamental firma pa gobernador di Aruba. Minister Dowers cu a felicita sra Proveyer y a desee hopi  exito den su funccion como directora di departamento di enseñsa di Aruba.

Diahuebs mainta Phil Strevett  di Colorado Springs Police Department tabata di bishita serca minister Arthur Dowers pa gradici’e pa e oportunidad di por haci su pasantia na Aruba K9 Academy. Phil Strevett ta guia di cacho y “keurmeester” di polis pa e National Police Canine Association. E asociacion ta certifica cachonan pa polis na Merca.  Algun luna pasa señor Strevett a solicita pa haci su pasantia na Aruba cerca Dick van Leenen, cu ta trainer na Aruba K9 Academy y e persona responsabel pa e programa di cacho di polis.

Durante e dos simannan di pasantia e agente Americano a train diferente tecnica di certificacion y practica pa cacho di vigilancia y deteccion di droga y otro articulo. E agente a siña aplica diferente tecnica y comando Hulandes cu lo bay aplica den su propio academia na Merca.