Desde final di 2009 ora cu mr. drs. Arthur Dowers a huramenta como minister di husticia y enseñansa pa e luna di mei di 2012 ya caba inverti mas of menos 24 miyon florin a wordo inverti den renobacion y restauracion di edificionnan di scol na Aruba.

Minister Dowers a comenta cu Pariba di Brug ya a inverti mas di 6 miyon florin y Pabao di Brug, unda tin mas scol como tambe scolnan mas grandi, e inversionnan ta sumando den careda di 18 miyon florin.

E mandatario a comenta cu e forma cu ta wordo traha ta cu bista ariba futuro, pa crea un alivio di plaso largo cu bon mantencion pa asina por disminui e sumanan inverti den infrastructura y por sigui incrementa e placa cu ta wordo inverti den e contenido di enseñansa.

Minister Arthur Dowers ta determina pa tur mucha y maestro por disfruta di luganan sigur, placentero y motivante pa tuma y duna les, como tambe unda mayornan ta sinti nan mes trankilo y confia di hiba nan yiunan diaramente pa nan educacion.

Minister Dowers a expresa cu den e periodo di gobernacion 2009-2013 tanto e infrastructura como enseñansa en general ta hayando e atencion debido cu pa hopi aña no a wordo brinda na e futuro di nos yiunan.

E team di Minister Dowers ta trahando duro hunto cu e mandatario, determina di completa un gran parti di e lista largo di renobacionnan necesario na scolnan rond Aruba. “Mester trece e infrastructura di nos scolnan na un nivel acceptabel bek,” sr. Dowers a comenta, añadiendo cu hopi trabao ya a tuma luga y cu e aña aki como tambe otro aña tin basta trabao ainda pa haci.

Diaranson merdia Minister Arthur Dowers a bishita Abraham de Veerschool pa wak con e trabaonan di renobacion ta avansando. E scol cu tabata den un estado deplorabel, ta hayando un renobacion completo. Temporalmente e scol a wordo reubica den e edificio cu antes tabata Prinses Christina School.

Minister Dowers ta siguiendo e proceso di renobacion di cerca y e biaha aki a topa cu representantenan di contratista Van den Broek na e sitio. E mandatario a expresa cu e ta sumamente satisfecho cu e adelantonan cu el a wak y tambe e ta hopi satisfecho cu e excelente cooperacion di parti di e contratista. El a describi e ambiente di trabao como uno sumamente positivo, unda cu e contratista ta hopi habri “pa discuti nos pensamentonan y haci cambionan necesario.”

Esaki ta un proyecto hopi importante pa educacion na Pais Aruba y particularmente pa e hobennan di San Nicolas, Minister Dowers a expresa. Abraham de Veerschool ta cumpliendo 60 aña y den pasado a conoce un renobacion cu no tabata di e miho calidad. Pero awo, como regalo pa e scol publico aki su di 60 aniversario, ta spera di por muda e scol bek den su edificio bunita y bon renoba asina cu e trabaonan ta cla.

Sr. Dowers a bisa cu e renobacion aki mester, combina cu bon mantencion, garantisa cu pa hopi aña e scol lo keda den condicion optimal y cumpli cu e proposito di brinda educacion na un nivel halto.

Minister Dowers a comenta cu Sint Augustinus College tambe ta ariba lista pa un renobacion grandi, John Wesley College tin mester di un renobacion menos grandi y Sint Michael School na Brazil ta den preparacion pa wordo renoba tambe.

Desde final di 2009, ora cu sr. Dowers a asumi e puesto di Minister di Husticia y Enseñansa, ya caba mas di 6 miyon florin a wordo inverti den infrastructura di scolnan na San Nicolas, entre otro den e renobacion grandi di Abraham de Veerschool, e renobacion di Prinses Christina School y pa porta y bentana nobo, como tambe verf paden y pafo na Santa Teresita y Santa Filomena.

Diaranson atardi e 18 Miembronan di Parlamento di Aruba presente a vota “pro”, asina dunando nan aprobacion na e Codigo Penal di Aruba (Strafrecht) actualisa. E Codigo Penal tabata data di añanan 60 y aunke cambionan a wordo haci den dje, nunca el a wordo revisa completamente manera esun cu a wordo aproba diaranson. Minister di Husticia y Enseñansa, mr. drs. Arthur Dowers a comenta cu e Codigo Penal a wordo actualisa pa inclui desaroyonan cu tabatin ariba tereno di strafrecht. A tuma basta aña pa completa y controla e trabao aki. Sr. Dowers ta di opinion cu Aruba awo tin un Codigo Penal cu ta haci e proceso mas eficiente y miho pa atende cu aspectonan di criminalidad den nos comunidad. Algun di e topiconan cu mas a resalta di e Codigo Penal actualisa ta: e seccion dedica na hobennan, omkering van bewijslast, TBS – ponemento di personanan na “disposicion di estado”, e posibilidad pa huez pone adictonan bao curatela durante un caso penal, e extension di e “verjaringsperiode” pa denuncia abuso sexual, e categorianan di boete nobo y e seccion encuanto “ambtsmisdrijven”.

Minister di Husticia y Enseñansa, mr. drs. Arthur Dowers den un entrevista diabierna a bisa cu enfasis “Cu Minister Dowers a kita ora di KGL, esey no ta berdad!”

E declaracion aki a bin en conexxion cu ponencianan cu ta circulando via BlackBerry Messenger di parti di un autor “anonimo” cu ta bisa cu e ta un mayor preocupa cu Minister Dowers a laga kita ora di KGL, o sea lesnan di Kennis van het Geestelijk Leven, conoci antes como Godsdienst.

Minister Dowers a expresa cu e ta lamenta hopi cu un persona cu ta enfatisa cu e ta un persona cu ta kere den norma, etc. por sconde tras di un “Ping” anomino y manda mentira asina aki rond.

“KGL no ta wordo saca di scol,” sr. Dowers a enfatisa.

Sr. Dowers a splica cu el a wordo informa cu lo tin un accion net despues di 11or di mainta y di biaha el a tuma contacto cu e hefenan di imigracion pa puntra nan si nan por garantisa cu e servicio di imigracion lo sigui. E hefenan, hunto cu algun empleado consciente di e impacto cu un welga asina por tin ariba e imagen di Aruba y en general ariba esnan cu ta biaha pa y for di nos isla, a tuma e trabao over y mantene e servicio. “Esey a bay hopi bon,” Minister Dowers a bisa y a gradici tur esnan cu a coopera pa e nomber di Aruba, ni e bon nomber di e departamento di imigracion wordo daña.

Mas atardi Minister Dowers a bishita e empleadonan pa papia y pa gradici esnan cu a coopera pa tene e servicio di imigracion habri.

Sr. Dowers a splica cu e protesta tabata encera topiconan cu ya a wordo discuti siman pasa den un reunion cu e sindicato y cu el a contesta tur nan preguntanan y splica tur cos cu ta wordo haci pa mehora e situacion na imigracion.

E “grupo di 2009″ cu ta wardando nan landsbesluitnan a wordo informa cu ta pushando pa nan keda cla y cu esaki ta den e fase final di e proceso na e momentonan aki.

Tambe tin un grupo cu nan documentonan no a wordo firma pasobra nan falta un opleiding, cual ta den preparacion awor aki, Minister Dowers a splica. El a bisa cu e tardansa a wordo ocasiona pa e hecho cu e opleiding existente no ta adecua y mester a wordo prepara y asina cu e ta cla e empleadonan por tuma esaki pa nan por haya nan bevordering.

Tur hende tin uniform, pero nan mester haya uniform nobo, sr. Dowers a splica cu awo cu e presupuesto ta aproba tambe e placa ta obtenibel pa e uniformnan nobo.

E mandatario ta lamenta  cu ta parce cu pa falta di informacion of falta di informacion corecto e empleadonan a participa na e protesta aki, pero ta haya tambe cu no mester tin panico pasobra servicio di imigracion ta sigui y no tin ningun necesidad pa cera aeropuerto.

“Tur loke por wordo haci pa e trabao cana optimal ta wordo haci pa tur esnan envolvi,” Minister Dowers a expresa.

Minister Arthur Dowers a sigura e mayornan cu Colegio P’ariba no lo bira un “tweederangsschool” y cu e ta condena cu e impresion a wordo crea cu algo ta bay pasa na cu no ta na beneficio di e alumnonan. El a keda hopi contento cu e mayornan a pidi participacion den e werkgroep y a pasa nan lista di firma, e carta y e nomber di e representante di biaha pa e werkgroep por tuma contacto cu sra. Dorff.

Minister Dowers a splica cu tur schoolbestuur tin nan responsabilidad, cada scol, cabesante y maestronan tin nan responsabilidad, pero cu gobierno tin e responsabilidad di tene “toezicht”, pues e control necesario pa sigura e calidad total di enseñansa.

E mandatario a comenta con e proceso a bay cu SMOA. El a acerca SMOA un aña pasa y pidi pa sondea e posibilidad pa Colegio P’ariba ofrece por lo menos HAVO te na examen. SMOA a bisa cu no lo ta problema, pero despues e minister a wordo informa pa algun mayor cu SMOA a bisa di lo bay cera e scol. Un biaha mas Minister Dowers a acerca e scol y tende cu no ta bay cera e scol y toch direpente a aparece un carta cu a wordo publica tambe den algun medio di comunicacion bisando cu SMOA no lo sigui cu Colegio P’ariba mas.

Minister Dowers a splica cu e no ta wak ningun problema pasobra toch gobierno ta financia tur scol na Aruba y ta cargando tur e peso di Colegio P’ariba caba, ademas di cu su team a renoba e scol tambe. Minister Dowers a enfatisa cu no tin ningun problema si schoolbestuur di openbare scholen mester tuma e responsabilidad di e maneho diario di e scol. E minister ta premira cu hasta lo tin hobennan di p’abao di brug cu lo scoge pa bin e scol nobo p’ariba tambe, pasobra esaki ya ta e caso cu e Middag MAVO.

Sr. Dowers a bisa cu e ta descarta completamente e preocupacion cu a wordo vocifera tocante norma y balornan na scol. Si e scol ta Catolico, Protestant of Publico of cualkier tipo di scol, norma y balornan ta wordo siña. E responsabilidad no por wordo tira ariba e scol so y mester wordo comparti entre mayor y scol pa duna esaki contenido den enseñansa y crea ciudadanonan cu ta bon den nos comunidad.

Sra. Ava Thode a introduci Prinses Laurentien, casa cu yiu homber di La Reina, Prins Constantijn.

Prinses Laurentien a conta con importante comunicacion cu mucha ta y cu el a stimula comunicacion cu su yiunan entre otro pa medio di lesamento. El a cuminsa lesa buki pa su yiunan di tempo cu nan haci 3 luna. Asina tanten cu e tabata stimula e comunicacion cu nan, e tabata siña nan idioma tambe.

Su Alteza a splica detayenan di su bukinan, con el a scoge pa Mr. Finney, cu e personahe principal no tin edad y cu su aventuranan tin relacion cu temanan di cuido y preservacion di planeta Tera.

Su bukinan ta dirigi tambe na yuda mayornan siña nan yiunan compronde e importancia di duna balor na y cuida nos mundo y su recursonan natural.

Prinses Laurentien a tuma su tempo pa contesta tur pregunta y papia cu e studiantenan, creando un ambiente hopi ameno. Durante su bishita, el a regala IPA un copia di su buki “Mr. Finney en de andere kant van het water” na Papiamento.

Diaranson mainta  Prinses Laurentien lo ta di bishita na Maria Goretti School.

Dialuna anochi na Willem III Toren e luznan a wordo cambia pa luz blauw como muestra di apoyo y sosten na tur hende cu ta biba cu autismo y nan sernan keri. “Light it up Blue” ta un di e accionnan cu ta tuma luga na varios monumento rond mundo pa promove conscientisacion tocante e condicion conoci como autismo.

Minister di Enseñansa Arthur Dowers a expresa cu un di e metanan principal di su ministerio ta pa ofrece tur hende e oportunidad pa por desaroya nan mes den enseñansa segun nan capacidad. Como tal tin diferente instancianan trahando hunto na realisa esaki. Un di e retonan cu ta wordo traha hopi activo ariba dje ta e eliminacion di e lista largo di espera pa haci test y haya un diagnostico. Ta pushando pa test y diagnostica esnan cu condicionnan special lo mas tempran posibel y asina yuda nan scoge e scol y direccion corecto pa nan por beneficia lo maximo di nan capacidad pa siña. Esaki ta wordo haci posibel entre otro pa medio di e Centro Multidisciplinario cu a wordo estableci recientemente.

E mandatario a comenta cu e ta hopi contento di tende cu frecuencia cu diferente mucha cu autismo ta logrando e maximo den enseñansa cu e guia ofreci na nan. Sr. Dowers a anuncia cu un comision lo wordo instala pa dedica hopi mas atencion pa e diferente gruponan den enseñansa haya mas atencion compara cu loke tabata e custumber den pasado.

Tambe ta haciendo esfuersonan maximo pa crea facilidadnan den e sistema tradicional di enseñansa pa acomoda e casonan excepcional manera ta nos mucha y  hobennan cu autismo.

Minister Dowers a añadi cu e tabata satisfecho di wak algun parlamentario presente y cu nan interes y sosten ora di eventonan manera Light it up Blue ta duna inspiracion pa sigui, pasobra kiermen cu e gruponan aki tin e atencion di Parlamento di Aruba.

Minister di Salubridad Publico y Deporte, dr. Richard Visser a splica cu e grupo di hendenan cu autismo ta grandi y creciendo y e ta un condicion cu ta manifesta su mes na asina hopi diferente manera cu mester tene e situacion bon na bista. El a bisa cu su ministerio lo sigui traha hunto cu Minister Dowers pa esnan cu autismo por sigui educacion y por biba un bida completo.

Minister Visser a comenta cu lo ta trahando tambe hunto cu Curacao y Hulanda pa bin cu plannan cu lo yuda provee miho cuido pa e miembronan di nos comunidad cu autismo.

Finalisando e ceremonia, e presidente di Fundacion Autismo Aruba, sra. Dilma Arends-Geerman a splica nan tin hopi trabao y cu e fundacion ta ricibiendo ayuda di exterior tambe y a wordo invita pa participa na e iniciativa global Autism Speaks na Merca. Autism Speaks tambe lo ta yudando Fundacion Autismo Aruba cu un investigacion importante cu lo resulta den un plan pa mehora e situacion pa esnan cu tin e condicion aki na Aruba. Sra. Arends-Geerman a conclui bisando cu e plan cu Autism Speaks lo crea ta basa ariba e problemanan cu tin na Aruba cu sugerencianan con pa haci uzo maximo y mas eficiente di facilidadnan obtenibel caba ariba nos isla.

Dialuna mainta 14 miembro di personal di KIA a cuminsa cu e curso destina pa e Middenkader di e institucion penitenciario di Aruba.

Na cuminsamento di e curso Minister di Husticia y Enseñansa, mr. drs. Arthur Dowers a bishita nan pa desea nan hopi exito y un proceso fructifero durante cua nan ta comparti experiencianan di practica combina cu e parti teoretico.

Minister Dowers a bisa cu e intencion ta pa nan comparti experiencianan di trabao, mientras cu nan ta siguiendo e parti teoretico pa esaki yuda den e formacion di sierto puntonan di salida pa maneho di e institucion.

Tin hopi esfuerso ta wordo haci pa cosnan cana bon atrobe, e mandatario a comenta. Pa tur plan wordo realisa e cosnan basico mester wordo regla prome y den esaki mester di e contribucion di e Middenkader di KIA, el a expresa.

E minister a añadi cu tin empleadonan cu ta menciona na dje ora e topa nan cu nan tin hopi idea y nan ta desea pa nan voz tambe haya oido, esaki ta un proceso unda cu e Middenkader ta hunga un rol. Middenkader ta esnan di mas importante den comunicacion cu e trahado, pa percura cu su ideanan wordo presenta y pa contribui na maneho a largo plaza, Minister Dowers a comenta.

Un factor importante di e proceso di e curso ta e momento cu e cursistanan ta haya pa refleha ariba algun topico importante. Ora nan ta na trabao nan ta ocupa continuamente cu problemanan diario pa garantisa e bon funcionamento di e institucion y no tin e tempo ni e oportunidad pa discuti of haci sondeo ariba e topiconan aki.

Minister Dowers a comparti cu e sa cu tin un competencia chikito entre e dos gruponan di 7 persona cada uno y cu na final e grupo cu sigui e programa completo sin faya lo haya un recompensa. Concluyendo su discurso cortico Minister Dowers a desea tur participante hopi exito y cu nan sigui e curso te na final.

Den menos di 10 minuut a instala un sensor nobo y a “fire up”e motor di AS-1. Esaki tabata solamente posibel y danki na e bon diagnostico cu Rosenbauer a haya di e mecaniconan di Cuerpo di Bombero y Rescate di Aruba den e caso di e truck cu a experencia un fayo den su motor diasabra pasa. Sr. Scott Obbink, un tecnico cu ta traha cu Rosenbauer Firefighting Technology, a expresa “E mecaniconan aki na Cuerpo di Bombero a haci un excelente trabao di diagnostica esaki y a dunami tur e informacion cu mi tabatin mester pa bay na Cummins y troubleshoot esaki.”

Rosenbauer ta e compania specialisa cu a traha e dos trucknan nobo pa Cuerpo di Bombero y Rescate di Aruba y Cummins ta un compania cu ta traha motor pa trucknan grandi y ta bende esakinan entre otro cu Rosenbauer.

Sr. Obbink ta splica cu e problema cu e motor cu a pone e truck nobo di Brandweer  AS-1 para direpente ariba caminda diasabra no ta algo cu sa pasa. E ta un fayo conoci solamente den e modelonan di motor di Cummins bieu. Esaki tabata pasa hopi aña pasa ora cu Cummins a produci e prome motornan cu sistema electronico, pero esaki ta prome biaha cu sr. Obbink a haya un keho asina di e serie di motor cu a wordo uza pa e trucknan nobo di Aruba.

Sr. Obbink a splica den detaya kiko a pasa. Un “crank position sensor”, cual ta manda e señal pa e centro di operacion di e motor pa manda fuel pa cada un di e cylindernan, no tabata bon. E tabatin un lekkage y zeta a drenta den e sensor, a expande esaki y un parti a move afo y a mishi cu e gear cu ta dun’e su informacion, causando asina e fayo.

Sr. Obbink a conta cu e ta lagando algun sensor extra cu e mecaniconan na Aruba, pero ya AS-1 ta funcionando bon atrobe y ademas nan a check AS-2 y tur cos ta bon.