Recientemente Minister di Husticia mr drs. Arthur Dowers a ricibi for di KPMG un rapport cu recommendacion nan pa institui y operacionalisa Aruba Gaming Control Board (AGCB) riba termino corto. AGCB lo ta encarga pa intensiva e control riba casino nan y tur tipo di wega di placa pa asina entre otro sigui cumpli cu e regla nan internacional di  Financial Action Task Force (FATF) cu ta pa combati labamento di placa y financimiento di terrorismo.

Actualmente e control riba wega di placa ta den encargo di Departamento pa Asuntonan di Casino (DAC), pero esaki ta mas tanto un control riba casino nan directamente na e porta. Pa sigui cumpli cu tur regla internacional di FATF, un Gaming Control Board ta sumamente importante cu lo ta encarga pa conduci un control mas (intenso y) digitalisa. Banda di esaki e ‘Landsverordening Toezicht Kansspelen’ lo wordo ahusta pa asina tur wega nan di placa lo cai bou di esaki.

Den e proceso aki DAC y P&O a wordo involvi pa asina determina e proceso di optimalmente incorpora e DAC den AGCB abase di Corporate Governance.

Diahuebs  minister di hustcia mr drs. Arthur Dowers a haci entrega di vestnan anti bala na cuerpo policial. Na momento di entrega minister Dowers a remarca di ta content di por haci entrega di e vestnan anti  bala aki, pero ta spera cu lo no mester pone e vestnan akin a prueba.  Manera cos ta awendia no por haci comosifuera ta 20 of 25 aña pasa ora cu un agente policial sali papia  cu un persona, cu e persona ta respeta polis. E mandatario a continua bisando cu tempo ta cambiando y cuerpo policial ta cambiando hunto cu esaki, garantisando e seguridad di e comunidad y di e agente policial.

Diahuebs mainta a entrega e prome lote di 200 vest anti bala pa agentenan policial, vestnan  anti bala pa e team di aresto., y algun material special mas. Na mes momento e compania cu ta entrega e vestnan aki a tuma midi di  150 agente policial mas cu lo wordo entrega den e proximo 2 lunanan.  Ta e intencion pa tur agente policial ricibi un vest anti bala na nan midi, como parti di nan uniform.

Minister Dowers a sigui bisa cu ta trahando duro pa un bes mas reestablece e respet y reduce e crimen den comunidad.  Danki na e fondonan di FDA cu e vestnan aki por a wordo cumpra pa cuerpo policial di Aruba.

Sr. David Ruso di Dana Safety Supply a duna di conose di ta contento  di por a entrega e vestnan aki y ta gradici tanto mando policial, y minister di husticia pa e confiansa .

Diaranson merdia Minister di Husticia y Enseñansa  mr drs. Arthur Dowers hunto cu inspector di polis sr Ricardo Muller a bishita diferente sitio na Aruba. Di e manera aki Minister Dowers ta pone su mes na altura di e diferente situacionnan den trafico cu no ta esunan mas optimal.  Tambe Minister Dowers a bishita e crusada  na ex-House of Cheng, cu a wordo sera algun siman atras. Tambe Minister Dowers a bishita e entrada di caya principal cu ta den renovacion y lo wordo habri pa trafico den proximo simannan. Inspector Muller a splica e mandatario di e “knelpunten” cu tin na varios lugar na Aruba y con lo por alivia e situacion. Minister Dowers a keda satisfecho cu e splicacion y awor ta bai trece algun instruccion den e comision di trafico.