Recientemente Minister di husticia  y enseñansa mr drs. Arthur Dowers a reuni cu e hefenan di su departamento. Minister a papia cu nan di e retonan cu tin den tur departamento den e parti  tecnico. A toca e punto con ta atende cu preguntanan con ta atende cu strafnan diciplinario of responsabilisacion disiplinario y con ta atende cu bijzonder verlof , vakantie etc.

A palabra cu den e siguiente reunion, cu lo tuma lugar dentro di algun siman, lo tin un presentacion amplio di DPO. E presentacion lo trata tur e asuntonan aki, y lo haci palabracion con ta haci esaki mas eficiente.

A bin constata cu na e momento aki ta haciendo hopi trabow cu ta costa hopi energia y cu no ta efectivo. E mandatario a duna di conoce cu kier bai stimula / motiva e personal pa traha den un forma mas optimal pa preveni  cu mester yega na strafnan diciplinario.

Diamars merdia Minister di Enseñansa mr drs. Arthur Dowers  a reuni cu tur e departamentonan cu ta resorta bow di ministerio di enseñansa  esta openbaar schoolbestuur, directie onderwijs y tambe SKOA, mirando cu  hopi scol ta cay bou di maneho di SKOA. Minister Dowers hunto cu su conseheronan a combersa na un forma hopi habri cu sindicato SIMAR , mirando cu minister tin e impresion cu  no tur ora SIMAR tin e informacionnan corecto di e pasonan cu ta wordo tuma den e ministerio di enseñansa.  Tin varios carta den circulacion dunando e impreshon cu nada no ta pasando den enseñansa na Aruba. Minister Dowers a splica e sindicato con leu e ta den e proceso  di re evaluacion di locual a tuma lugar e ultimo añanan.  Mes momento e titular di enseñansa a pidi e sindicato nan comprencion pa e hecho cu pa soluciona e problema cu tin den enseñansa  riba termino largo, nos mester cuminsa awor na drecha e base. Minister Dowers a mustra SIMAR cu prueba tocante e rechtspositionele vraagstukken  di e personal , cual e sindicato ta keha hopi biaha riba dje, cu hopi di e problemanan aki  berdad ta dura hopi aña cu trahadornan ta experencia, pero no por simplemente solucione dor di saca e documento di e trahadornan cu keha mas y laga e documento di esnan cu no keha  keda drumi (wanta sin atende). Mester jega na un comprondemento  di con e systema ta desfuncional y  e ora bo por bai traha na un base caminda bo ta percura pa  e cosnan aki no pasa mas den futuro. Locual ta importante pa nan compronde  ta  cu na un dado momento  bo mester tin un sistema cu ta funciona. E sistema ey  mester ta asina cu si abo tin derecho riba algo , bo tin cu percura pa dentro di un periodo acceptabel , cual no opinion di minister Dowers ta 6 siman, cu un departamento puntra pe esaki por haya un contesta.

Minister Dowers a sigui informa cu recientemente ela firma documentonan  di  trahadornan cu a haci peticion 10 aña pasa, y a asina tin mas ehempel.  E mandatario ta di opinion cu esaki ta inacceptablemente  largo. Bo no ta solucionando e problema dor di core firma tur a peticionnan  aki den pura, pero mester yega na fundeshi di e asunto aki y wak unda e problema ta sinta y ban traha pa solucione.

E sindicato a compronde e situacion aki. Tambe minister Dowers a mustra esnan presente  riba otro situacion nan e.o e mantencion di e scolnan  e discucionnan di e trailernan na e scolnan, cantidad di muchanan den klas. Tur e asuntonan aki ta den proceso di discucion awor aki  y pa yega na solucionnan a largo plaso y structural bo mester compronde e problema. E analisis cu ta hacienda awor ta dunado tur e contestanan, pa por traha na un manera structural den futuro.

Recientemente Minister di husticia mr drs. Arthur Dowers  a haci entrega  di bevordering na algun miembro di cuerpo di bombero.

Sr. Denis Eduwardo a ricibi bevordering  pa adjunct –onderbrandmeester.

Sr. Rudolf Calmes a ricibi bevordering  pa hoofdbrandwacht 1^e klasse.

Srs . Pedro Croes, Anthony Evertsz, Gerald Donato , Orlando Giel, Howard Hoo, Renwick  Kock,  Alejandro Valentijn  a ricibi nan bevordering pa hoofdbrandwacht.

Srs. Kenrick  Croes, Alexander Simmons, Oswald Yarzagaray, Rosellini Kelly  y Fransy Leest a ricibi nan bevordering  pa brandwacht  1^e klasse

Srs. Gabriel Kelly y Enry Dirksz  a ricibi un pin como muestra di reconocemento  pa nan 30 aña di sercio den cuerpo di bombero.

Minister Dowers a felicita esnan cu a ricibi na bevordering di cual  nan tin derecho riba dje.  Y a gradici nan pa e bon  trabou cu nan ta desplesganado.

Diahuebs mainta Minister encarga cu Biblioteca Nacional Aruba a bishita e facilidad principal Oranjestad. Aki e mandatario a combersa cu e trahadornan cu ta den accion actualmente.  Minister Dowers a duna di conoce cu berdad e edificio aki a wordo neglisha  pa varios aña, y a splica e trahadornan cu e ta den combersacion  habri cu e director di e departamento aki.

Minister Dowers a sigui splica cu ta purbando mas liher posibel pa yega na un solucion pa e situacion aki. Tambe e minister a accentua  cu bo no por soluciona un problema di varios aña den un siman. Esaki ta tuma tempo. A haci un apelacion na e trahadornan y e representante di sindicato pa papia cu e  trahadornan pa nan sigui cu nan labornan. No ta necesario pa ta para pafor pasobra no tin un conflicto entre leiding, gobierno y trahadornan, mester simplemente traha na un solucion .

Diahuebs mainta Minister di Enseñansa mr drs. Arthur Dowers a bishita Jacinta Kleuterschool na Dakota pa asina pone su mes na haltura di e ola di vandalismo tumando lugar na e scol aki. Cabesante y maestranan di e scol a ricibi e mandatario y a mustre e diferente destruccionnan cu a tuma lugar.  Minister Dowers a lamenta cu por tin malechornan cu ta kibra y drenta den lugar destina pa educacion y formacion di un pais, y a informa nan cu e lo haci lo maximo  na su alcanse pa soluciona e situacion aki a corto plaso. Tambe  minister Dowers lo sinta cu instancianan concerni pa mira con por preveni e tipo di actonan aki den futuro.

Minister di enseñansa mr drs. Arthur Dowers a bishita Colegio Arubano na San Nicolaas. Aki e mandatario a pone su mes na altura di e adelanto di e construccion di e hala nobo caminda lo tin e localnan pa N+T , CKV, y tambe localnan di studio.  E persona encarga cu Colegio San Nicolaas sr. Johnny Fingal a duna minister Dowers un update di e adelanto di e construccion di e seccion nobo pa e scol. Tambe sr. Fingal a informa e mandatario di e planes pa cu a scol aki.  E plan ta pa e seccion nobo keda cla promer cu e aña escolar nobo.   Minister Dowers a keda contento cu locual ela mira durante su bishita.

Recientemente Minister di enseñansa mr drs. Arthur Dowers a continua cu su bishita na scolnan rond di nos isla. Cada best a yega na e conclusion cu mucho poco a wordo inverti  de enseñansa , den e edificionan . Segun minister Dowers den su consepto ta tristo cu hopi placa a bai den cosnan cu no tabata prioridad, y a neglisha futuro di e pais aki. E mandatario ta spera di por inverti locual a wordo presupuesta den enseñansa  y cu mester bai pone hopi mas placa disponibel den e añanan venidero.  Na EPB  san Nicolas minister Dowers a constata un situacion sumamente tristo caminda el a tuma nota di  un cura di scol bastante sushi , y ta lamenta cu esaki ta tuma lugar na caminda nos ta hiba nos jiunan pa nan ricibi enseñansa.   Minister Dowers a compromete su mes pa haci su maximo esfuerso pa aloca mas placa posibel den senseñansa. Enseñansa ta e  base y e future di e pais aki, y si nos sigui neglishe manera ta wordo constata, nos ta hacienda danjo no solamente na e muchanan sino na henter e comunidad.

Actualmente ta hacienda evaluacio na tur e scolnan rond di nos isla pa wak cua ta esnan cu mester di airco cu mas urgencia. Promer cu yega na esaki mester haci reparacionnan na e daknan di varios scol. E di dos cos cu mester sosode ta cu mester  upgrade e sistema di coriente, mirando cu varios di e scolnan ta construi basta anja pasa y no ta capacita pa carga airco  riba nan red di coriente.

Algo otro cu e mandatario di enseñsa a constata ta cu hopi biaha a haci mal uso di e placa, caminda no tabata usa e placa di un forma adecuado y ta haci escohencianan robes y na final di dia bo ta haya e situacionanan manera cu e edificionan ta aden awe.  Si bo inverti cada aña un tiki den e edificio, bo ta preveni cu bo edificionan ta cya den otro. Minister  Dowers ta na altura cu ta un disaster tin na hopi scolnan actualmente, pero cu e plan cu tin actualmente , lo mira e prioridadnan y reparti e placa presupuesta mas tanto posibel  y asina hopi di e muchanan lo haya un ambiente bon y mihor cu locual tin awor ora nan regresa scol den e aña escolar venidero.