Diabierna atardi na Restaurant Epilicious di EPI Hospitality and Tourism Unit, famia y coleganan a reuni pa celebra hunto cu sr. Luis Rudolfo, un educador hopi respeta y keri, e di 25 aniversario di su carera como “meneer di scol.”

Na e celebracion aki, Minister di Husticia y Enseñansa, mr. drs. Arthur Dowers a expresa su admiracion pa Sr. Luis “Wicho” Rodulfo y a felicit’e y gradici’e pa tur cos cu ela hasi pa su studiantenan durante tanto aña como educador.

E minister a expresa cu ela keda sumamente impresiona e prome biaha cu ela combersa cu sr. Rodulfo y tambe pa e discripcion cu su coleganan a duna di dje na e fiesta.

“Un persona berdadero di enseñansa, un persona cu ta pensa mas ariba e studiante, mas ariba e resultado, mas ariba tur e cosnan cu nos por hasi conhuntamente pa yega na un mihor resultado pa e studiante,” sr. Dowers a remarka, dirigiendo su mes na sr. Rodulfo.

E mandatario a comparti cu den sr. Rodulfo e ta wak cu admiracion un berdadero maestro y un hende cu ta dun’e e gevoel di tin educacion y interes di su studiantenan semper hopi presente.

Minister Dowers a conclui bisando, “Mi ta kere cu loke boso ta hasi den enseñansa, tur esnan cu ta dedica nan tempo, nan bida na hasi posibel pa otro muchanan hay e oportunidadnan cu nos a haya…esey ta algo di admira y sigur si ta hasi’e cu e passion cu abo ta hasi’e.”

Minister Dowers tambe a splica cu e cuido di maestro ta central pa su Ministerio y aunke con preta su schedule por ta e ta consider’e masha importante pa ta presente na ocasionan importante den e bida y carera di nos maestronan.

Sr. Luis “Wicho” Rodulfo a cuminsa su carera na 1981 na Rosario College y despues a sigui crece den su profesion di educador.

Despues di algun aña Wicho a dicidi di bay den exterior pa specialisa su mes y a logra su tweede graads diploma den Bedrijfseconomie. Wicho a wordo nombra na 1998 como docente di economia na MAO school y asina a forma parti tambe di MAO School, cu awendia ta conoci como Colegio EPI unidad Economia. Na 2001 Wicho a haya su vaste pensioen gerechtigde dienst den servicio di gobierno.

Wicho su coleganan ta remarka, “por bisa cu e ta un persona perseverante, dinamico, determina, un tremendo colega y cu semper a duna su maximo exfuerzo pa logra cosnan na bienestar di e studiante.”

Un otro calidad cu su coleganan no a menciona, pero Minister Dowers a conclui y pone tur hende hari ora ela hasi un remarke ta cu Wicho mester ta hopi stressbestendig, pasobra e tin “25 aña den enseñansa y asina tiki cabey blanco.”

Sra. Corinne Dettmeijer-Vermeulen, rapporteur pa traficacion di hende pa Hulanda, y sra. Jeannette Richardson-Baars, Coordinador Nacional Anti Traficacion y Contrabando di Aruba y un comision di profesionalnan envolvi den e proceso di deteccion, investigacion y ayudo di victima di traficacion di hende a reuni cu Minister di Husticia y Enseñansa, mr. drs. Arthur Dowers na Bestuurskantoor diabierna mainta.

Den e conferencia di prensa despues di e reunion, Minister Dowers a anuncia e cuminsamento di un campaña di conscientisacion cu ta hiba e titulo “Habri bo wowo!” y ta duna un lista di indicadornan di traficacion di hende. E lista ta pa yuda tanto publico general como e victima potencial pa detecta e forma di abuso aki.

Minister Dowers ta boga pa ayudo y proteccion di esnan cu ta den un posicion vulnerabel y por ta of por bira victima di traficacion di hende y e abuso cu nan ta experencia.

Mundialmente e problematica di traficacion di hende ta existi, y tambe na Aruba, pero hopi biaha e victima no sa cu su situacion di biba of traha no ta normal of e tin berguensa of miedo pa raporta cu e ta kere cu e ta un victima di traficacion di hende.

Un otro factor cu ta hasi cu traficacion di hende no ta wordo raporta, ta cu comunidad no ta consiente di kiko exactamente ta wordo califica como traficacion di hende y tampoco no sa unda pa bay of ken pa yama ora tin pregunta ora nan detecta un of otro irregularidad.

Sra. Richardson-Baars a enfatisa cu na Aruba tambe tin caso traficacion di hende. Ela splica cu recientemente tabatin un caso chikito y tin uno grandi cu ta ainda ta den corte. E caso grandi a rekeri cooperacion di diferente autoridadnan den varios pais y a conta cu entre otro asistencia tecnico di Hulanda.

Esaki ta un campaña pa tanto e victima como publico siña detecta e indicadornan di traficacion di hende y yuda na liberacion di e victima y castigo di e abusador.

Sra. Dettmeijer-Vermeulen a splica cu e situacion no ta presenta solamente den e area di prostitucion, pero tambe cu crianan y hendenan cu ta traha den e industrianan di agricultura y construccion, por ehempel. E victima por ta un hende cu a wordo treci di un otro pais, pero tambe por ta un hende cu ya ta biba na e pais unda cu e abuso ta tuma lugar, sra. Dettmeijer-Vermeulen a indica.

Tur caso cu wordo raporta pa publico of victima na e helpline, number di telefon 592-3231 of via email LCMM@kparuba.com ta wordo investiga, sra. Richardson-Baars a enfatisa. E helpline ta den funcion 24 ora pa dia. Guia y proteccion di e victima di traficacion di hende ta sumamente importante y na Aruba ta conta cu asistencia di varios instancia y institucion, entre otro slachtofferhulp, Fundacion Hende Muher den Dificultad y Departamento di Asuntonan Social.

E cooperacion internacional ta bon regla y e comision y autoridadnan di Aruba tin contactonan cu organisacionnan den otro paisnan cu lo traha hunto pa yuda investiga y resolve casonan di traficacion di hende, como tambe yuda e victimanan optimalmente si y ora ta necesario.

Minister di Husticia y Enseñansa diaranson mainta a reuni cu miembronan di cuerpo policial na POVA. E sala tabata completamente yen y hopi pregunta, remarke y sugerencianan a wordo discuti den un bon ambiente.
Aunke tin basta oposicion di parti di e miembronan di Cuerpo Policial concerniendo e inrichtingsplan of reorganisacion di 2003, Minister Dowers a splica pakiko esaki no por simplemente wordo poni un banda. Tin un discusion andando basta tempo encuanto esaki y e mandatario a añadi cu tin factornan tecnico cu mester tene na cuenta, entre otro cu tin algun practica ya den funcion basa ariba e planning aki cu nunca a keda regla legalmente. Pa un introduccion corecto di e inrichtingsplan di 2010 mester regla esun di 2003 prome y despues por introduci e cambionan, ela añadi.
E mandatario a expresa di tin hopi comprension pa e situacion y circumstancianan cu a causa duda y desconfiansa grandi pa loke ta e proceso di reorganisacion y introduccion di e inrichtingsplan nobo. E proceso a tuma basta aña, tin cosnan cu a bruha y consequentemente e miembronan di Cuerpo Policial a cuminsa duda hopi unda ta concerni e topico aki.
Minister Dowers a bisa cu varios tema cu a wordo discuti tambe lo ta puntonan di discusion na futuro reunionnan entre ministerio y e Korpschef pa hunto busca solucion pa esakinan.
E combersacion di diaranson mainta a bay den un ambiente positivo y constructivo, apesar cu tin hende cu ta purba continuamente pa crea discordia y trece informacion eroneo afo cu ta stroba procesonan pa cana mucho mas ordena y trankil, e minister a expresa. Esaki no ta algo cu ta preocupa Minister Dowers pasobra e ta gusta tene e lineanan di comunicacion habri cu tur esnan envolvi y asina kita duda y duna splicacion corecto unda y ora cu mester.

Minister Arthur Dowers ta boga pa comunicacion habri y busca y pidi contribucion di esnan envolvi “pa nos yega na cosnan miho pa nos organisacionnan, pa nos trahadornan y pa e pueblo di Aruba.”
E ta afirma, “Esey ta mi meta, dia mi a sign up mi a sign up pa esey, mi ta keda hasi’e y nos ta hasiendo e.”

E titular di Husticia y Enseñansa ta confirma cu tin hopi caminda cu tin cosnan cu mester wordo drecha y ta añadi cu e participacion activo di trahadornan lo tin un resultado final exitoso y cu ta wordo carga pa tur esnan cu ta forma parti di e organisacion.

Diaranson Minister di Husticia y Enseñansa, sr. Arthur Dowers y Minister di Economia, Asuntonan Social y Cultura, sra. Michelle Hooijboer-Winklaar a firma un Memorandum of Understanding (MOU) cu Rietveld Academie di Hulanda pa explora e posibilidadnan pa habri un kunst academie na Aruba, cuminsando cu e pre-fase pa prepara hobennan pa bay studia na e academia Hulandes aki.
E meta ta pa desaroya entre e Departamento di Enseñansa, e Departamento di Cultura y Rietveld Academie un programa pa prepara studiantenan local den e pre-fase di nan formacion. Si esaki resulta posibel y exitoso lo probablemente tambe ofrece e programa completo cu ta conduci na un Bachelor Degree. Asina lo ofrece no solamente oportunidadnan mas amplio pa studiantenan local por sigui un estudio HBO na Aruba mes, pero tambe esaki lo sirbi pa atrae studiantenan di Europa y di nos region pa bin studia na nos isla.

Dependiendo di e acogida y resultadonan, den futuro ta posibel cu lo aserka Universidad di Aruba cu ya tin e experticio necesario pa ofrece e Master Degree.

Esaki ta un reto sumamente interesante, Minister Dowers a bisa. No solamente lo ta un oportunidad pa stimula creatividad di hobennan di Aruba, pero esaki por crea un oportunidad nobo pa por bende Aruba como destinacion pa educacion, e mandatario a añadi.

Nos temporada di estudio ta un tempo den nos bida cu nunca nos ta lubida. Nos ta biba henter nos bida cu e experiencia ey y ta comparti e storianan di nos “studententijd” cu hopi entusiasmo. Manera nos ta embahadornan di e paisnan unda nos a studia, hobennan cu bin Aruba pa studia tambe lo sigur sirbi como embahadornan pa nos isla.

Diamars atardi cambionan den e ley di scolnan avansa VWO, HAVO y MAVO a haya aprobacion unanime den Parlamento di Aruba despues di varios tanda di pregunta y intercambio di informacion entre Minister di Husticia y Enseñansa, mr. drs. Arthur Dowers y Miembronan di Parlamento.
Entre e cambionan di ley ta e introduccion di e ciclo basico cu ta e prome dos añanan di scolnan MAVO, HAVO y VWO y varios articulo cu ta regula elementonan basico, importante di e scolnan secundario concerni.
Cu e aprobacion pa Parlamento awor e fundeshi di MAVO, HAVO y VWO ta regula oficialmente pa ley, incluyendo cuanto ora di les mester cumpli cun’e pa siman como tambe e materianan cu mester ta parti di e curiculo.

Minister Dowers ta splica cu e aprobacion di leynan cu ta pendiente, pero ya e introduccion a wordo implementa, ta un paso importante den cumpli cu bon practica di gobernacion.
Hopi legislacion a keda atras y no a pasa Parlamento ainda y nan a wordo introduci y ta den practica den no solamente e areanan di e ministerionan di husticia y enseñansa, pero hopi otro area y tin hopi critica ariba esaki, Minister Dowers a añadi.
A bira practica comun pero incorecto den añanan cu a pasa, cu implementacion ta wordo pusha y no tin un ley pa regula esakinan oficialmente.
Un meta hopi importante ta pa tin introduccion di ley of cambionan den ley y e implementacion di loke ta para den e ley bay man den man, Minister Dowers a conclui.

Minister di Husticia y Enseñansa, mr. drs. Arthur Dowers diabierna anochi a efectua e apertura di e prome “Open Avond” di Colegio EPI, Educacion Profesional Intermediario.
Minister Dowers a felicita e maestronan y dirigentenan di e scol, pero specialmente e studiantenan cu tabata para cla pa brinda un caluroso bonbini na e hobennan cu lo bishita e actividad y cumpli cu e tarea hopi importante di motiva nan pa sigui studia.

E mandatario a expresa cu e ta contento cu e sistema di “outreach” introduci na EPI, unda cu e scol ta esun cu ta extende un man den comunidad y invita hobennan y nan mayornan pa bin bishita e scol pa busca informacion. E heuspednan a wordo invita pa tuma un tour di e facilidadnan y papia cu studiantenan y maestronan ariba tur faceta di e estudionan ofreci y oportunidadnan pa futuro carera y profesionnan.

Particularmente pa hopi di e studiantenan cu ta duda den nan decision pa un estudio futuro, esaki sigur ta yuda, Minister Dowers a expresa. Tambe ela felicita e organisacion di EPI den su totalidad pa e bon campaña di promocion pa e actividad aki.
Na e prome “Open Avond” di EPI, tur 4 areanan di studio – e asina yama “units”, a habri nan porta y invita tur esnan interesa den sera cono su nan scol pa bishita nan.

E meta principal di e anochi tabata pa studiantenan di EPB, MAVO y Colegio Arubano cu ta para dilanti hasi escohencia di pakket di material, y consequentemente posiblemente nan futuro carera, pa haya un idea di kiko e unitnan di EPI tin di ofrece, kiko ta e rekerimentonan basico pa aplica pa studia na EPI y pa nan personalmente por wak con e scol fisicamente ta hinca den otro.E 4 unitnan di EPI ta Economia, Ciencia y Tecnologia, Hospitabilidad y Turismo, y Salud y Cuido.

Diabierna merdia Minister di Husticia y Enseñansa, mr. drs. Arthur Dowers a participa na entregamento di certificado na miembronan di Cuerpo Policial cu a completa e entrenamento di motorbrigade cu exito.
“You survived this week,” un di e instructornan di e compania Mericano “Ride Like A Pro NJ” a bisanan cu orguyo. Su expresion “Boso a sobrevivi e siman aki” sigur ta indica con duro e agentenan mester a traha pa completa e curso di un siman.

Ela indica cu e agentenan cu a ricibi nan certificado a completa un training hopi intensivo, segun normanan estricto estableci na Merca cu tur “motor officer” mester cumpli cun’e. E normanan aki ta “permiti pa solamente e elite bira motor officer,” ela enfatisa.
E instructor a bisa e agentenan cu nan mester ta orguyoso di por awor traha hunto cu nan coleganan cu a completa e mesun curso aña pasa.

Minister Dowers a expresa su aprecio pa e miembronan di Cuerpo Policial cu a caba e curso. No solamente e Unidad Motorisa ta hunga un rol hopi importante ora di control di trafico, pero tambe hopi biaha ta esnan cu ta wordo yama ora mester ofrece asistencia mas liher, e mandatario a bisa.
Ela splica nan cu bishitantenan di otro paisnan semper tin elogio pa e Unidad Motorisa di Aruba. Entre otro e ministernan di Corsow y St. Maarten cu tabata na Aruba recientemente a expresa cu nan tabata masha impresiona pa e motorbrigade di nos pais, e minister a añadi.
Alto Comisario Dolfi Richardson, cu a bishita e agentenan durante di e entrenamento, a menciona cu e curso ta hopi bon y hopi profesional. Ela gradici e coleganan Mericano cu a duna e curso y particularmente a expresa su aprecio pa e miembronan di Cuerpo Policial cu a mustra interes pa sigui e curso aki y expande nan conocemento y abilidadnan den un area diferente di nan profesion.

E instructornan Mericano Sergeant Bill Hughes, Lieutanant Allan Attanasio, Ken y Gerry di Ride Like A Pro NJ, di New Jersey a bin Aruba pa un siman pa duna e curso pa “motor officer” na 12 polis di Aruba. Nuebe di e participantenan a caba e entrenamento cu exito, nan ta: Alexander Henriquez, Frank van der Lende, Jozefes Reuters, Eugene Boekhoudt, Andre Tromp, Rayenne Kock, Derrick Wever, Howard Garcia y Emile Carolina.

Minister di Husticia y Enseñansa, mr drs Arthur Dowers, Comandante di Brandweer, Edward de Cuba y representantenan di sindicato di trahadornan di Brandweer SINBA a tene un reunion diaranson anochi.

Durante e reunion a discuti puntonan di preocupacion, proceduranan y e relacion entre e sindicato, e comandante y e mandatario.
Tabata e ora ey tambe cu e presidente di e sindicato, sr. Davni Rosa, a bisa cu contrario di loke ela declara poco dia pasa den medionan di comunicacion, SINBA no a tuma contacto cu e organisacion internacional di aviacion civil, ICAO, pa busca informacion.

E sindicalista a splica cu esaki mas bien tabata un tactica pa atrae atencion, pero nunca e lo hasi algo pa perhudica e rating di Aeropuerto Internacional Reina Beatrix y consequentemente turismo di Aruba. “E ta algo irresponsabel pa nos hasi,” sr. Rosa a bisa.

Sr. Rosa a mustra hopi satisfecho cu e resultado di e reunion. SINBA a pidi pa un reunion mensual cu Minister Dowers y a expresa cu nan ta compronde cu tur punto cu nan a papia discuti ta wordo traha ariba.
E liderazco di SINBA tambe a expresa cu nan ta compronde cu nan prome contacto ta e comandante di Brandweer y cu cosnan cu ta pega, manera bevorderingnan, no ta pega na e mandatario su oficina.
Comprension, pasenshi y boluntad ta palabranan cu a resona den un entrevista cu sr. Rosa, un indicacion sigur cu a establece un bon base pa sigui traha hunto na bienestar di e trahadornan y e organisacion y asina naturalmenta na beneficio di comunidad di Aruba y su bishitantenan.

Sr. De Cuba a bisa, “Tur cos ta canando.” E la añadi cu tur hende a compronde cu mester tin un poco mas pasenshi pa procesonan di gobierno cuminsa cana.

Splicando e situacion actual di e autonan, Sr. De Cuba a bisa cu e autonan di Brandweer ta mas cu 10 aña biew, pero falta dos aña mas pa nan wordo totalmente afgeschreven. Ela splica cu e autonan ta yega y paga candela, nan ta yega y duna asistencia na accidente, dus e autonan ta traha y funciona bon unda cu mester.

Algun cos ta tuma su tempo, e comandante a bisa, añadiendo cu auto nobo a wordo pidi caba y ta dura 8 luna pa e autonan wordo traha.

“A logra cosnan caba y ta bay logra mas cos,” sr. Rosa a conclui satisfecho despues di e reunion cu Minister Dowers.
Diahuebs mainta Sr. De Cuba y representantenan di SINBA a sinta hunto pa discuti y repasa tur cos y pone punto ariba “i” unda cu tabata necesario.

Minister di Husticia y Enseñansa, mr. drs. Arthur Dowers diaranson mainta a bishita KIA pa un reunion cu tur trahador di e institution.
E conbersacion, durante cua trahadornan di tur area, departamento y rango a trece dilanti diferente factornan  di preocupacion y iritacion, a bay den bon ambiente.

E tres puntonan di mas importante cu tin pendiente na KIA ta e reorganisacion, educacion y bevordering, Minister Dowers a resumi y a bisa cu e meta ta pa tin tur cos ariba un rij y funcionando manera mester ta dentro di un aña.

Minister a splica cu e problemanan ta hopi mas grandi cu normalmente nan lo ta pasobra implementacion di varios plan di reorganisacion y no siguiendo un linea cu ta bon coordina a causa un situacion hopi confuso.

Shete diferente plan pa reorganisacion di KIA a wordo traha den pasado y despues cu sr. Dowers a asumi e puesto di minister un aña y mey pasa, su Ministerio ta trahando ariba evalua e situacion den KIA, como tambe kiko ta e miho plan pa reorganisa e institucion.
Entre otro ta evaluando un rangenstelsel nobo, como tambe e situacion di evaluacion di futuro trahadornan di KIA.
Ademas di tur reto cu tin, bevorderingnan di empleadonan no solamente ta pega pa via e situacion di nan opleiding, of nivel di educacion, pero aunke tin mehoracion tambe Personeel en Organisatie (P&O) no ta funcionando optimalmente.
Ministerio di Husticia a resolve e situacion di e opleiding pa bewaarder cu no ta funcionando awo pa medio di crea un opleiding nobo y a pone Scol di Polis na encargo di esaki pa garantisa continuidad.

Seguridad ta un punto di hopi preocupacion serka e mandatario. Ela haya indicacion di varios trahadornan di KIA cu den e institucion ta traha hendenan cu no ta tene na cuenta cu nan accionnan por pone bida no solamente di nan mes, pero tambe di nan coleganan na peliger.

Minister Dowers a comparti su preocupacion cu e trahadornan y a pidi nan cu mescos cu tin trahador cu a aserk’e pa comparti nan preocupacion, e ta pidi tur hende pa traha hunto pa yega na un solucion.
“Ban drecha loke ta malo,” Minister Dowers a pidi. Ela enfatisa cu si hasi sigur cu e bon base solido t’ey, cu ta cumpli cu tur procedura y regla lo evita fayonan cu por cuasa problema di seguridad y risico pa bida di hende.

Encuanto e remarkenan recientemente hasi den medionan di comunicacion unda cu trahadornan di KIA a wordo tilda pa ta “appel putri”, Minister Dowers a comenta cu e persona a expresa su mes asina pa via cu mester ta sincero y admiti cu tin hendenan trahando den KIA cu ta perhudica e institucion su reputacion. E mandatario a enfatisa cu si cualkier persona  bisa cu tur trahador di KIA ta corupto of acusa tur trahador di cosnan ilicito, e lo tabata e prome pa sali na nan defensa di biaha.

Minister Dowers a pidi e trahadornan pa documenta cosnan cu mester cambia y manda esakinan pa su Ministerio por inclui esakinan den nan planning, por ehempel tin trahador cu a menciona stulnan kibra, bonnan di cuminda, placa di piket, y mas.
E mandatario a menciona varios biaha cu awor mester cumpli cu proceduranan, mester pone sistemanan den function y mester traha ariba e soluciona e buraconan den e sistema pa asegura cu cosnan por cana manera mester ta y foutnan wordo evita.
Problema cu prisonero no ta bay stop, Minister Dowers a expresa, pero “nos mester reduci e risiconan pa nos mes…nos tin trabao pa hasi.”