Union Europeo ta haci un sondeo a fondo y ta pidi diferente evaluacion, splicacion y compilacion di dato prome cu concede un subsidio na e gobierno di un pias of un proyecto. Tur placa cu Union Europeo ta inverti ta bin cu su destinacion (bestemmingsplan) bon defini, incluyendo den e caso aki tambe un reserva pa evaluacion di e resultadonan di e programanan pa cua e subsidio ta destina.

Aruba tin algun tempo caba ta negocia un inversion cuantioso y valioso pa nos Enseñansa, cual a wordo realisa diahuebs cu e firmamento di un convenio entre Comisario di Desaroyo di Union Europeo, Andris Piebalgs y Minister di Husticia y Enseñansa di Aruba, Arthur Dowers. E subsidio di €8.8 miyon (25 miyon Florin) lo wordo inverti den organisacion y desaroyo di Directie Onderwijs, profesionalisacion di maestro, entre otro remedial teaching, taalbeheersing, didactiek y mas, como tambe revision di e programanan di enseñansa.

Na juni 2010, ariba peticion di Union Europeo un estudio di Aruba su eligibilidad pa ricibi apoyo pa budget a wordo realisa. Esaki tabata e di dos biaha cu esaki a tuma luga. E estudio a concentra ariba dos condicion: sostenibilidad di e situacion macro-fiscal y credibilidad di e programa di reforma PFM. Un di tres condicion tabata e adaptacion di e strategia den un sector (maneho di enseñansa).

Cu e subsidio aki, Union Europeo ta confirma y ta keda demonstra cu tur e esfuersonan y trabao duro cu ta tumando luga di parti di gobierno, como tambe esnan cu ta traha diaramente den e area concerni, ta hopi aprecia y consecuentemente ta merece confiansa y su bon recompensa. Den e caso aki e recompensa ta bay directamente den futuro di nos hendenan, den nos yiunan y e mas di 1400 maestro y demas personanan cu ta traha den nos sistema di enseñansa, y asina ta hunga un papel importante den desaroyo general di nos hendenan y Pais Aruba.

E crecemento grandi di e populacion di Aruba a trece cun’e cu e sistema a wordo poni bao di presion, mescos cu ta e caso cu e sistema di cuido y medio ambiente. E desaroyo di nos isla a wordo ampliamente discuti y un plan integral strategico nacional a wordo compila y  gobierno di Aruba ta convenci cu pa medio di enseñansa e plan aki lo forma y lo yuda crea un situacion generalmente miho balansa pa nos pais.

E planificacion pa enseñansa ta parti den dos taki: uno ta e mantencion y optimalisacion di e provision y infrastructura actual y e otro ta e modernisacion di e sistema completo.

Tres area di prioridad:

E tres areanan cu tin prioridad den e proceso aki a wordo identifica pa Minister Dowers hunto cu Departamento di Enseñansa.

E di prome ta pa crea apoyo mas amplio den nos comunidad pa enseñansa pa medio di construi lasonan y aliansanan cu y den nos comunidad, cual ta inclui e sociedad civico, den e medio ambiente di scolnan mes, como tambe cu e sector di negoshi/priva.

E di dos area ta e calidad di e forza laboral di enseñansa, incluyendo e administracion y maneho na un banda y desaroyo/capacitacion di e personanan directamente envolvi den e proceso di enseñansa.

Acceso universal na enseñansa ta e di tres area cu a wordo identifica como un factor importante den desaroyo di e sistema di enseñansa. Esaki ta parti den tres elemento: mehoracion di e accesibilidad fisico, accesibilidad socio economico y inclusion social.

E subsidio di 25 miyon Florin sigur ta un regalo hopi bunita pa Ministerio di Enseñansa y tur hende envolvi den e sistema di enseñansa na Aruba. E bon noticia a yega net na momento cu Gabinete Mike Eman ta commemorando nan di dos aña di gobernacion cu diferente decisionnan y proyectonan importante den beneficio di nos comunidad tumando luga.

Den e sector di enseñansa entre otro a conoce un mehoracion impactante nunca antes realisa di e infrastructura fisico di hopi scol. Ademas, tin basta otro scol cu ta ariba lista pa un renobacion y tambe trabao cu ta wordo haci ariba e contenido di enseñansa y den e area di cuido pa maestro.

Diabierna anochi den auditorium di EPI a tuma luga e huramentacion di e graduadonan di EPI Salubridad y Servicio. Minister di Husticia y Enseñansa a conta con na caminda pa e ceremonia e tabata corda tempo cu e mes a gradua como enfermero hopi aña pasa y a huramenta dilanti defunto Minister di Husticia Watty Vos den e auditorium di Horacio Oduber Hospitaal. El a menciona cu di e enfermeronan presente, Juliet de Palm y Rudolf Robles a gradua hunto cun’e y mescos cu e studiantenan diabierna bisti den nan uniform blanco a ricibi nan flornan, asina nan tambe nan a huramenta, pa despues ricibi nan prome felicitacion di e cabesante di e curso, sr. Richard Maxwell.

Awenochi ta un coronacion ariba e obra cu bosonan a bin ta desplega durante boso carera escolar, Minister Dowers a enfatisa y a comparti den nan sentimento di orguyo y felisidad. EPI mag di ta sumamente orguyoso di e contribucion hopi importante cu e scol ta haci na e graduado y su famia, pero particularmente tambe pasobra e scol ta entrega profesionalnan cu ta contribui na un forma importante na e comunidad cu ta garantisa cuido pa nos tur pa hopi aña, e mandatario a añadi.

“E responsabilidad cu bo tin no ta solamente pa bo duna cuido, pero ta bay hopi mas leu cu esey,” mr. drs. Arthur Dowers a bisa. El a remarca cu banda di cuido, e enfermero ta duna informacion y guia y no mester lubida e oportunidad di porta hasta contribui na enseñansa di futuro enfermeronan como docente.

E mandatario a encurasha e graduadonan pa percura pa sigui educa nan mes y tene na cuenta cu cambionan den nos comunidad, como tambe e desaroyonan hopi rapido di tecnologia medico.

El a comenta cu mester considera no solamente hospital como e opcion pa eherce e profesion di enfermero, pero enfermeria ta extende den diferente servicio, cuminsando di e prison pa e institucion pa cuido mental, Wit Gele Kruis, duna informacion den scolnan y hopi mas.

“Boso ta personanan cu berdaderamente por bay contribui na un forma hopi amplio na boso comunidad,” Minister Dowers a bisa y el a expresa e deseo pa e graduadonan motiva otronan pa sigui den nan pasonan, pasobra “nunca tin suficiente enfermero den nos comunidad ni den e comunidad internacional.”

Minister Dower a conclui felicitando e studiantenan den nomber di gobierno y su colega, Minister di Salubridad y Deporte, dr. Richard Visser, ken el a representa tambe na e momento di e huramentacion, ora e studiantenan a tuma nan asina yama “volksgezondheidseed”.

Diaranzon mainta Minister di Husticia y Enseňansa, mr. drs. Arthur Dowers tabata invitado di sr. Aldrich Croes na 100.9FM den e programa Entrevista di Dia.

Sr. Croes tabatin anteriormente como invitado sr. Armand Hessels cu a bisa cu cosnan no ta bay manera mester ta y el a menciona cu den e rapport WODC a wordo seňala cu tin diferente situacion cu ta permiti gobierno comete un tipo di corupcion legal. Sr. Hessels a duna como ehempel di corupcion legal e decision di Minister Dowers encuanto otorgamento di e proyecto di modular spaces of klasnan modular.

E mandatario imediatamente a remarca cu corupcion legal no ta existi, tur corupcion ta ilegal y si cualkier hende ta di opinion cu el a comete un acto ilegal, nan por haci denuncia na Ministerio Publico. Sr. Dowers a enfatisa cu e no ta mete den trabao di Ministerio Publico, ken cu kier haci un denuncia ta wordo atendi y si acaso Ministerio Publico ta haya necesario nan lo investiga y dicidi na final si di berdad tin corupcion y si tin base pa un caso. Ministerio Publico ta funciona completamente independiente, el a enfatisa.

Minister Dowers a expresa cu e ta considera hopi di e expresionnan haci ultimamente y e uzo di e palabra corupcion cu frecuencia pero sin accion, como tactica pa crea un esfera negativo.

Sr. Dowers a indica cu e comentarionan den e raport WODC encuanto practicanan ilegal ta referi na loke e gobierno anterior tabata haci, pues otorga sierto proyecto y mara nos pais financieramente sin un destaho publico ni un Ministeriele Beschikking (MB). Esaki sigur no ta loke e ta haciendo. Minister Dowers mes tabata di opinion antes cu tur proyecto mester bay destaho publico, pero despues di tempo el a bin realisa cu den algun caso esaki no ta e miho opcion y pesey mes tin e opcion pa regla cosnan via un Ministeriele Beschikking.

Encuanto e comentarionan di sr. Hessels, Minister Dowers a bisa cu den un democracia hende tin libertad di expresion, pero e ta contraresta si loke sr. Hessels a sugeri, cual ta cu e persona cu a haci e oferta pa e proyecto di klasnan modular lo a contribui na e campaňa politico di Minister Dowers. “Esaki absolutamente no ta berdad,” e mandatario e enfatisa.

Sr. Dowers a aňadi cu e no a papia ni topa cu e persona aki tempo di campaňa y tabata conoce su famia, pero no e. El a enfatisa cu nunca el a haya un cen di e comerciante aki y cu e decision concerniendo e proyecto a wordo tuma a base di un analisis haci pa diferente persona y departamento cu a mustra cu esaki ta un solucion duradero pa un situacion cu ta costa hopi placa, pero no ta cumbiniente pa Pais Aruba.

Destaho publico no semper ta e miho opcion y ademas e ta un proceso largo. Por ehempel pa por sigui cu e trabao di renobacion na Biblioteca Nacional a tuma un aňa pa completa e destaho publico y tur proceso relaciona cun’e. Ademas, no ta tur ora e compania cu haci e bid mas abao ta wordo otorga e proyecto y  tampoco nada no ta garantisa cu e preisnan cu ta wordo ofreci den un destaho publico na gobierno di berdad ta e miho preis pa un producto.

Na Hulanda, por ehempel, ta trahando pa introduci reglanan y structuranan nobo cu lo provee posibilidad pa e mandatario desvia di un destaho publico pa por negocia na beneficio di e pueblo.

Minister Dowers a invita otro partidonan pa tambe participa y manda nan sugerencia y oferta pa reemplasa e trailernan na e scolnan. Un di e doňonan di trailer, representando un grupo di e doňo, a sinta cu e minister y a menciona espacionan modular di Colombia, pero e persona aki nunca a manda e oferta aki pa minister. Awor, entre otro, minister a ricibi un otro oferta pa construccion cu bloki na un preis di Afl. 2000 pa meter cuadra.

Minister Dowers a expresa cu e no ta compronde pakiko no ta concentrando ariba otro topico di e WODC raport manera e ley cu ta exigi partidonan politico pa mustra di unda nan financiamento ta bin. “Mi mes ta bay pusha esaki. Bo mester ta transparente,” e mandatario a enfatisa.

“Ami tey pa traha pa e pueblo. Ami no a bin den politica pa faborece ningun hende, mi a bin pa traha pa pueblo. Cada decision cu mi tuma cu ami ta ordeel cu esaki ta na bienestar di e pueblo mi ta tumele y si e no ta asina ey ni si e bay destaho publico mi no ta acceptele pasobra mi ta kere cu cosnan cu wordo haci mester ta den bienestar di pueblo,” Minister Dowers a conclui.

Diamars anochi, Minister di Husticia y Enseňansa, mr. drs. Arthur Dowers tabata huesped di Tito Lacle den Papia Cla na TeleAruba unda cu el a contesta diferente pregunta ariba topico di interes general. A cubri tres tema na un forma hopi directo, cu poco palabra.

Encuanto KIA, Minister Dowers a confirma cu ta berdad cu ta buscando e miho candidatonan pa forma e gerencia nobo, pero tambe cu e team di maneho actual cu a wordo apunta temporalmente lo sigui traha pa un tempo pa sigui guia e proceso y traspasa e trabao debidamente.

E mandatario a remarca cu ta trahando cu un planning cu a resulta di un “quick scan” cu a wordo haci di e institucion y ta remediando e situacion di siguridad. Principalmente e situacion caotico cu e personal tabata pega aden pa via di falta di atencion debido pa hopi aňa ta tumando su tempo pa resolve.

E minister a splica cu a traha y ta trahando duro na un structura di maneho nobo y a pidi e team di maneho pa e continuidad di e trabao ya haci, pa nan keda traha na KIA te ora cu e puestonan cu mester wordo yena ta yena y e maneho wordo traspasa manera mester ta.

Tabatin un poco turbulencia den e situacion rondo di  e curso cu cuidadonan di preso tabata siguiendo y esaki tambe a wordo resolvi. Na momento cue instructornan a pone trabao abao a yega e mensahe na Minister Dowers cu nan no tabata kier sinta mas cu minister pasobra ta pa hopi aňa caba tin problem cu nan pago. Tabatin un malentendemento den esaki y minister a reuni cu e instructornan y ya nan ta bek na trabao. Sr. Dowers a splica cu el a expresa den un entrevista su preocupacion di no tabata ricibiendo informacion directo y cu el a wordo informa cu e maestronan no kier a papia mas, pero ya e dia despues di e entrevista nan a reuni cun’e na su oficina.

Minister Dowers a aňadi cu e caso tabata entre otro cu un di e maestronan tabatin mas di 4 aňa wardando un pago y tanten cu ya nan a sigui duna e curso awor, e mandatario ta trahando cu diferente departamento di gobierno pa nan zorg pa e proceso keda finaliza pa e maestronan haya nan pago manera mester ta.

Tambe sr. Dowers a menciona en corto e situacion cue klasnan modular.  E mandatario a splica atrobe cu el a combersa cu un di e representantenan di e doňonan di e trailernan ora cu el a cuminsa busca un bon opcion duradero pa reemplasa e trailernan cu ta poni na varios scol como klas y oficinanan. E mes persona aki a priminti di presenta un oferta completo.

Na final di dia ta un doňo di trailer so a presenta un plan y oferta completo, Minister Dowers a bisa. Despues di considera e proposicion bon, e mandatario a haya esaki e miho opcion pa traha lihe, ofrece un producto completo, duradero y di bon calidad. Minister Dowers a aňadi cu tur hende tin e libertad y derecho di lanta un caso y den e situacion aki no ta diferente.

Minister Dowers a splica cu despues cu e proyecto di klasnan modular a wordo discuti den prensa, e otro doňonan di trailer a entrega un oferta pa 16.8 miyon florin pa construi klasnan di construccion tradicional, pues bloki, y despues hasta a entrega otro oferta cu nan lo por haci’e mas barata cu esey tambe.

Sr. Dowers a bisa cu naturalmente tur hende ta liber pa acerc’e cu ofertanan cu nan por cumpli cun’e pa proyectonan, pasobra tin mas proyecto manera construccion y renobacion di scolnan cu ta tumando luga y ainda mester tuma luga . Absolutamente no ta asina cu e otro doňonan di trailer no tabata sa di e intencion di e minister pa reemplasa nan trailernan pa un producto mas duradero, tampoco ta berdad cu nunca nan a haya un oportunidad pa haci un oferta.

Na final di e programa, Minister Dowers a expresa cu e ta spera cu por corta poco “red tape” pa por facilita procesonan y haci tur cos cana mas lihe. El a duna e ehempel di e biblioteca nacional cu a tarda mas cu un aňa pa porfin por a sigui cu trabaonan pa via di procesonan largo y red tape.

E ultimo 10 añanan nos a wak mas legislacion y tratadonan y protocolnan internacional cu ta trata cu un di e crimennan mas horifico cu nos conoce, Minister di Husticia y Enseñansa, mr. drs. Arthur Dowers a comenta. Aruba ta orguyoso di por contribui na duna contenido na e tratadonan aki, el a añadi. Minister Dowers a enfatisa cu un di e mehoracionnan mas importante den e combatimento di e crimen aki ta e forma con e victima ta wordo trata. Aruba ta orguyoso di por yuda duna contenido na e tratadonan aki, Minister Dowers a añadi.

E crimen na cual e mandatario tabata referi ta e traficacion y contrabando di hende, un acto ilicito cu na Aruba afortunadamente conoce solamente 1 pa 2 caso pa aña, pero ta rekeri hopi trabao proactivo y preventivo.

E seis islanan di Caribe Hulandes, ariba un iniciativa di Ministerio di Husticia di Aruba na juni a firma un Memorandum of Understanding encuanto e topico aki, demonstrando nan compromiso pa traha hunto na mehora nan taskforcenan y servicionan pa victima. Tambe nan a accepta dia 18 di october como Dia Contra Traficacion y Contrabando di Hende.

Como un prome paso den e cooperacion aki, e Taskforce di Aruba y e Coordinador Nacional tabata anfitrion di e prome seminario encuanto traficacion y contrabando di hende y abuso di mucha pa medio di explotacion laboral y turismo di sexo na Aruba. U.S. Department of Homeland Security a organisa e facilita e seminario, presentando topiconan y casonan interesante na e delegadonan di Corsow, Jamaica y Aruba. E seminario tabata hopi interactivo cu varios discusion den grupo.

Minister Dowers a expresa cu mester reconoce cu no solamente legislacion ta importante, pero e muhenan y hombernan dedica y cu curashi cu ta traha diariamente na preveni e crimennan aki y brinda apoyo na e victimanan ta merece elogio y sosten.

E mandatario a remarca cu e tabata wak un programa cu ta data di poco aña pasa na television Hulandes recientemente unda cu e trato di e victimanan tabata laga hopi di desea. Afortunadamente esaki a cambia y tin un acercamento diferente awendia cu e accento ariba prevencion y trato humano di e victima; esaki ta un mehoracion importante, el a añadi.

Minister Dowers a conclui cu cooperacion ta hopi importante y e ta agradece Department of Homeland Security cu ta brindando apoyo cu nan expertisio na e team di Aruba, como tambe na autoridadnan di nos region cu a atende e seminario cu a clausura diabierna.

Diabierna atardi diferente miembro di prensa a acerca Minister di Husticia y Enseňansa, mr. drs. Arthur Dowers pa un reaccion ariba e expresionnan di Presidente di SPA encuanto indexering.

Minister Dowers a splica cu ta derecho di tur sindicato pa trece tur punto dilanti cu nan ta desea di discuti ariba mesa. “Nos a discuti tur tema cu mester wordo discuti cu ta regarda e condicionnan di trabao, e condicionnan bao di cual nos personal ta traha, tur e derechonan cu nan tin,” e mandatario a comenta. “Pero ora ta trata di negociacionnnan pa aumento di salario y mehoracion di condicion di salarionan, cual tin consecuencianan financiero, e Minister di Finansa ta determina si esaki ta posibel of no,” el a splica.

Minister Dowers a bisa cu e sindicato mester haci un peticion pa un reunion cu Minister di Finansa y Minister di Asuntonan General pa negocia e indexering y cu e sa cu semper nan porta ta habri pa papia cu e representantenan di e trahadornan.

“Tin na e momentonan aki den tapara caba un mehoracion di salario pa polisnan y mi ta spera cu esaki tambe ta na satisfaccion di tur polis,” e titular di husticia a expresa.

Ora cu prensa a puntra Minister Dowers kiko e ta pensa encuanto di e expresion di e Presidente di SPA cu si e partidonan no yega na otro La Reina ta na Aruba aki poco dia, e mandatario a comenta cu e no a tende ningun momento cu tabatin un expresion den direccion di La Reina of bishita di La Reina. “Pero si esey a tuma luga, esey no ta corecto, pasobra mi ta haya cu e caminda pa yega na cualkier cos ta na mesa y no durante bishita di La Reina,” el a conclui.

Diabierna atardi Telefon pa Hubentud a introduci su website unda cu hobennan ta wordo invita pa comunica cu e voluntarionan di e fundacion via di chat, email y un online forum. Vice Presidente di e Telefon pa Hubentud, Errol Zebeda a conta cu a tuma 2 pa 3 aňa pa e organisacion yega na un website cu ta cumpli cu tur e necesidadnan di e hoben di Aruba y e rekisitonan cu e organisacion tin pa brinda e miho servicio y cumpli cu su grupo di enfoke manera mester ta.

Minister di Husticia y Enseňansa, mr. drs. Arthur Dowers a felicita e organisacion cu nan instrumento nobo di comunicacion y a gradici nan pa e trabao valioso cu nan ta haciendo na bienestar di e hubentud di Aruba.

Minister Dowers a expresa cu no solamente Telefon pa Hubentud a demonstra di ta desaroya hunto cu e hubentud di Aruba, pero tambe cu e organisacion a demonstra cu nan conoce y ta reconoce e retonan nobo cu tecnologia nobo ta presenta. Awor ta mas facil pa yega na hende na un forma anonimo y causa nan daňo dor di entre otro pest y treiter nan, e mandatario a bisa. El a aňadi cu tecnologia tambe tin su parti positivo y e ta contento di wak Telefon pa Hubentud usa e aspecto positivo pa yuda esnan cu ta acerca nan.

Sr. Dowers a expresa cu asina Telefon pa Hubentud ta yega hopi mas hoben, semper cu e accento ariba e bienestar di e hoben.

El a comenta cu contrario na solamente casonan cu ta sali den publicidad, e voluntarionan di Telefon pa Hubentud ta conciente di e dolor di hopi mas hoben cu ta sufri di y biba cu e concequencianan di maltrato manera abuso sexual. Minister Dowers a splica cu hopi di e casonan no ta bin dilanti, pero Telefon pa Hubentud si ta yega nan pa brinda nan e sosten cu asina hopi nan mester.

Minister Dowers a conclui expresando un biaha mas su gratitud na voluntarionan y dirigentenan, como tambe tur cu ta contribui na e organisacion asina valioso, conoci pa su number di telefon 131, Telefon pa Hubentud. El a comenta cu e ta desea pa e desaroyo positivo sigui fuerte y positivo entre NGOs y organisacionnan gubernamental na bienestar general, pero den e caso aki, particularmente na bienestar di e hobennan di Aruba.

Commandant di Brandweer, Edward de Cuba, hunto cu Chef Logistiek y Garashi Max Lampe y Monteur Terry Agunbero ta na e fabrica Rosenbauer na Merca pa test e dos trucknan nobo pa Cuerpo di Bombero cu ya ta casi cla pa pone ariba barco y manda Aruba. Tambe presenta ta sr. Johnny van Meeteren di NASA Aruba, agente pa Rosenbauer.

Ora sr. Arthur Dowers a tuma e Ministerio di Husticia bao su responsabilidad dos aña pasa, un di e kehonan mas grandi cu semper tabata bin dilanti den su combersacionnan cu e top di Cuerpo di Bombero y miembronan di e cuerpo, ta e estado di e trucknan y falta di mas truck.

Seis truck nobo a wordo cumpra mas of menos 10 aña pasa, pero nunca nan a wordo “refurbished”, nunca truck nobo a wordo cumpra tampoco y uno pa uno e trucknan a cuminsa faya y duna problema. Aunke e garashi di Brandweer mes tabata haci un bon trabao cu e trucknan, toch e necesidad pa truck nobo a sigui crece.

Esaki a bira un di prome compranan grandi cu Minister Dowers a pone ariba presupuesto pa Brandweer y a para ariba cu esaki mester tuma luga asina cu e presupuesto keda aproba pa Parlamento. E proyecto mester a bay destaho publico di biaha, unda a pidi esnan cu kier a bid pa e trucknan cu esakinan no ta “off the shelf” pero traha specialmente pa Cuerpo di Bombero di Aruba.

Minister Dowers a pidi trahadornan di e Departamento di Brandweer pa pone tur specificacion ariba papel pa asina Pais Aruba cumpra dos truck di Brandweer cu ta fabrica specificamente pa Aruba y cu ta cumpli cu e necesidadnan y exigencianan di un Cuerpo di Bombero moderno y eficiente. E costo total pa e dos trucknan ta di 3 miyon florin.

E trucknan nobo di Cuerpo di Bombero di Aruba ta hopi moderno y equipa cu tur instrumento y equipo necesario. E trucknan aki tin equipo pa duna asistencia durante di accidente di auto tambe y si ya ta dunando asistencia cu e trucknan aki, no mester yama mas pa materiaalwagen, sr. De Cuba ta añadi.

Rosenbauer ta un compania cu mas di 140 aña di experiencia y ta specialisa den tur loke tin di haci cu tecnologia y recursonan pa brandweer. Mundialmente tin 11 fabrica cu ta traha truck pa bombero; Rosenbauer ta esun mas grandi. E compania ta conoci como fabrica cu ta ofrece inovacion constante y e trucknan pa bombero mas sigur ariba mercado.

Srs. De Cuba, Lampe y Agunbero a yega na e fabrica dia 10 di october y a cuminsa traha di biaha ariba e testmento di tur dos truck. “Esaki ta encera cu nos ta test e sistemanan electrico, hydraulico y pneumatico, con e truck ta core, con e motor ta traha, con e sistemanan ta traha, pero tambe lo test e pomp pa su funcionamento,” Commandant De Cuba el a splica. “Tambe tur e aparatonan inclui den e truck ta wordo getest,” el a añadi.

Sr. De Cuba ta splica cu ya nan a haci poco cambio y a fine-tune sierto detayenan ariba e truck. Lo tuma mas of menos dos siman despues cu e team di Cuerpo di Bombero caba haci e testnan pa e fabrica finalisa tur cos y pone e dos trucknan ariba barco na caminda pa Aruba.

Durante e testmento, di parti di Rosenbauer sr. Timm Reifschneider, e representante di cliente pa Cuerpo di Bombero di Aruba y sr. John Wickert, ken ta encarga cu e construccion di e truck mes, ta semper presente.

Rosenbauer tin fabrica na Merca y Europa y ta traha truck pa departamentonan di bombero na tur parti di mundo.

E curso pa trahadornan di KIA a wordo para pa e docentenan cu a bisa cu no a haya pago pa nan trabao. “Nos tambe ta sumamente decepciona y desapunta cu e curso aki a wordo para na e forma aki. Ta lamentabel, ya cu pa hopi tempo e trahadornan no a logra haya un opleiding y nos a haci esfuerso grandi y a pone hopi hende move pa toch logra start e curso,” Minister di Husticia y Enseñansa, mr. drs. Arthur Dowers a comenta diamars atardi.

Minister Dowers a pidi un reunion cu e docentenan pa haya sa exactamente kiko ta pasando y unda cosnan por a pega. Desafortunadamente, e docentenan a nenga y sr. Dowers ainda no sa si e cuater docentenan ta referi na e pagonan di un curso cu nan a duna den pasado y nunca a ricibi pago of e curso cu a caba di cuminsa. E mandatario kier sa exactamente kiko por a bay robes, pasobra el a firma tur documento, manda nan pa nan sigui e proceso y e docentenan mester a wordo paga.

El a comenta cu lamentablemente tin un disputa pa basta aña caba loke ta trata pagamento di e docentenan, pero den pasado no tabatin un besluit y hasta tabatin un curso cu e docentenan a duna pa cual nan a warda tres aña pa ricibi nan pago.

El a añadi cu tur esfuerso ta wordo haci di banda di su ministerio cu financas y personeelszaken pa e docentenan haya pago pa nan servicio.

Minister Dowers a enfatisa cu e trahador di KIA no tin arte ni parte cu finansas y otro departamento di gobierno no por of ta cumpli cu e pagonan. E trahador tin derecho ariba su opleiding, e oportunidad pa desaroya su mes pa por duna un miho contribucion na su trabao y pa e por crece den su rechtspositie na KIA, sr. Dowers a expresa.

E titular di husticia y enseñansa a bisa cu tanten cu ta reglando e pago di e 4 docentenan y otro detayenan pa sigura continuidad, e ta bay papia cu esnan cu ta organisa e curso y porta lo mester busca otro docente pa tuma e proceso over, ya cu e docentenan actual no ta demostra cu nan ta obtenibel. Den e caso cu e curso cuminsa di nobo, mester por garantisa cu e opleiding cu ta cuminsa, sigui y caba sin interrupcion, el a conclui.

Dialuna y diamars a tuma luga un workshop hopi interesante facilita pa Jill Molli, un experto den “Conscious Discipline”, Disiplina Consciente. Un total di 220 educador, guia di mucha na Traimerdia y diferente crèche, mama, tata y hasta un wela, a participa na e workshop pa siña metodonan pa disiplina y guia nan muchanan. E metodonan aki ta alternativo, inovativo y diferente na esunnan cu mundialmente pa hopi tempo hendenan ta usa, pero tambe hopi simpel y facil pa imita hasta na cas, como tambe eficiente y hopi efectivo.

Na cuminsamente di e workshop, sra. Molli a pone tur hende lanta para y haci un baile cu e ta instrui maestronan pa haci cu nan muchanan, pero tambe e facilitadornan di e curso ta usa cu adulto, y sin excepcion tur hende ta relaha y hari masha duro na final. Na Aruba no tabata diferente. Minister Arthur Dowers tabata entre esnan cu a participa na e ehercisionan na apertura di e workshop dialuna mainta y el a comenta cu e baile a pone tur hende relaha un tiki y habri nan mente y nan mes pa e informacion cu ta wordo comparti.

E minister di husticia y enseñansa, cu tambe tabata un educador den enfermeria, a bisa cu maestronan cu a yega di tuma e workshop a cont’e di e diferencia grandi cu e metodonan a haci den nan trabao diario y hasta pa nan mes personalmente. Esaki a entusiasma Minister Dowers pa brinda su apoyo na oportunidadnan cu ta yuda expande e uso di Conscious Discipline na Aruba, na tur scol. “E tipo di cosnan aki mester ta parti di e sistema di enseñansa,” el a añadi, refiriendo na e metodonan cu ta yuda crea un conexion entre maestro y alumno y ta yuda alivia loke ta molestia e muchanan pa duna nan un oportunidad pa desaroya nan mes bon.

E mandatario ta haya cu muchanan no mester bay scol solamente pasobra nan mayornan ta manda nan, pero nan mes mester sinti e motivacion y kier bay scol y scol mester ta un luga placentero pa bay tambe.

E workshop ta yuda e participantenan mes desaroya y ta equipa nan tambe pa traha na desaroyo di hobennan y famianan na nos pais, el a añadi. E curso aki no solamente ta importante pa esnan cu ta traha den enseñansa, pero tambe ta contribui na formacion y nationbuilding, Minister Dowers a enfatisa.

Hopi bez bo kier logra algo, pero na mes momento dor di bo mes comportacion, e forma cu bo ta acerca un sierto reto cu bo tin, bo no ta logra e resultado cu bo kier, cual ta crea basta frustracion pa bo mes y crea frustracion tambe pa hende rond di bo y sigur pa muchanan cu ta crece den bo comunidad, e mandatario a splica.

“Hopi di e metodonan cu ta wordo usa no ta cosnan complica, pero hopi cosnan cu bo no ta consciente di dje. E curso aki ta un curso cu tur hende por sigui y e ta equipabo cu e instrumentonan pa bo atende cu situacionnan den bo trabao como educador, pero tambe den bo bida diario,” Minister Dowers a comenta.

E mandatario ta considera e workshop aki un oportunidad bunita pa gobierno por demostra nan sosten y apoyo na esnan cu ta traha duro y duna parti grandi di nan mes pa educa nos futuro generacionnan. El a añadi cu tin mas curso cu lo wordo duna den e periodo nos dilanti y sigur e workshop di Conscious Discipline lo ta entre e cursonan mas importante cu ta wordo ofreci.