Diahuebs atardi a cuminsa e tratamento di e cambionan cu mester wordo haci den Wetboek van Strafvordering di Aruba pa loke ta trata “Bijzondere opsporingsbevoegdheden”. E ley aki ta wordo implementa pa tur partner den Reino Hulandes y na e siguiente reunion di Ministernan di Husticia di Reino cu lo tuma luga na Aruba na juni 2012 lo discuti e topico aki atrobe, ora cu tur partner a introduci e ley.

E BOB-wet, manera e ta wordo yama, ta provee pa polisnan por uza metodonan mas moderno y tecnicanan diferente durante investigacionnan. E ley aki ta regula tapmento di telefon, infiltracion – conoci como trabao “undercover”, y otro metodonan y tecnologia. Entre otro e ley lo duna un dimension nobo na hopi investigacion, como tambe lo duna mas oportunidad pa Cuerpo Policial y Ministerio Publico profundisa y refina e investigacion y adkiri e cantidad y calidad di prueba necesario pa por combati crimen miho. Particularmente den caso di crimen organisa cu ta dispone di hopi placa y ta move hopi lihe, e ley aki ta duna Cuerpo Policial y Ministerio Publico mas espacio pa traha.

E BOB-wet ta un instrumento importante pa por atende cu crimen cu lo yuda polis y Ministerio Publico adkiri y compila mas y miho prueba contra criminalnan.

Minister di Husticia y Enseñansa, mr. drs. Arthur Dowers a adresa tur pregunta haci pa e Miembronan di Parlamento durante e reunion. Algun di e topiconan tabata: con lo garantisa cu derechonan humano no ta wordo trapa, confidencialidad y si tin y di unda lo saca e fondonan pa implementa e tecnologia y tecnicanan necesario.

E mandatario a sigura cu derechonan humano di tur hende ta hancra den tratadonan internacional y e sistema di corte lo percura pa e leynan den e strafrecht wordo manteni tambe. Ministerio Publico ta percura tambe pa tur partido envolvi den haci e investigacion atene nan mes na leynan y jueznan semper ta percura pa toets tur caso bon, Minister Dowers a bisa.

E Cuerpo Policial di Aruba nunca tabatin problema cu e cuido di confidencialidad. E titular di husticia a bisa cu e no tin ningun duda cu esaki lo wordo proteha manera semper el a wordo proteha y e no ta wak ningun motibo pakiko esaki lo cambia.

Tin fondo pa e financiamento di e tecnologia, formacion y informacion cu mester wordo adkiri despues cu e BOB-wet wordo aproba, Minister Dowers a expresa. Esaki lo bin parcialmente di FDA entre otro, unda cu tin un “meerjarenplan criminaliteitsbestrijdingsfonds”, un fondo pa proyectonan pa combati criminalidad. Pero, Cuerpo Policial ta bay tin mester di mas fondo, sr. Dowers a comenta, añadiendo cu e ta spera cu ora cu acerca Parlamento pa realoca fondo, Ministerio di Husticia lo haya e cooperacion necesario den esaki tambe.

A conta tambe cu cooperacion di parti di Orde van Advokaten (ordo di abogadonan) cu a duna nan conseho ariba e contenido di e ley.

Presidente di Parlamento Paul Croes a cera e prome tanda y schors e reunion diahuebs atardi, anunciando cu probablemente lo sigui cu e di dos tanda diabierna mainta.

Dialuna mainta Cuerpo Policial a ricibi agentenan Yeniree Peña, Paul Suete y Wendy Paesch bek como miembro di nan team. Den presencia di Comisario Trudy Hassell y nan chefnan di districto, e tres agentenan a huramenta dilanti Minister di Husticia y Enseñansa, mr. drs. Arthur Dowers na Centro di Husticia na Macuarima.

E mandatario a bisa cu ta un señal hopi positivo ora cu hende kier re-integra den Cuerpo Policial. El a añadi cu Cuerpo Policial ta bayendo den e direccion positivo y e ta hopi satisfecho cu e desaroyonan tumando luga.

Sr. Dowers a gradici e agentenan pa nan re-ingreso y a añadi cu e ta spera di e agentenan, hunto cu nan coleganan, cu nan lo tambe yuda contribui na e parti di maneho di e cuerpo. E minister a splica cu esnan cu ta traha ariba caya y cu ta den contacto cu comunidad continuamente ta esnan cu ta tende e dolornan y ta sinti e señalnan di e necesidadnan di nos comunidad. El a pidi e agentenan pa haci’e parti di nan responsabilidad pa e informacion aki yega na top di Cuerpo Policial, asina e informacion aki por wordo uza y transforma den maneho cu ta beneficia no solamente e Cuerpo Policial den su totalidad, pero principalmente e comunidad di Aruba.

Minister Dowers a conclui deseando e tres agentenan, korspleiding y henter Cuerpo Policial hopi forza y energia awo cu nan ta drentando e siman mas pisa di e temporada di Carnaval.

KIA, Reclassering, Voogdijraad y Kinderbescherming tabatin un necesidad grandi pa un bon rehabilitacion. Asina Minister di Husticia Arthur Dowers a discribi e situacion penoso cu el a haya na e departamento y servicionan aki na 2009 ora el a tuma responsabilidad pa e carteranan di husticia y enseñansa. Den dos aña di tempo, trahando duro cu e staf y personal na e instancianan aki ta logrando avancenan importante pa crea miho oportunidadnan pa prevencion y rehabilitacion pa nos comunidad.

Den lineanan grandi, e metanan ta pa traha proactivo pa preveni cu hobennan ta envolve nan mes den crimen y pa yuda y guia personanan di tur edad cu ya a keda envolvi den cualkier crimen pa rehabilita.

A cuminsa cu varios proceso hunto na mes momento. A muda y duna Reclassering mas y miho espacio y material, como tambe a adkiri mas empleado. Ademas, tin un sondeo andando pa adkiri e sistema di banchi di GPS pa pia (GPS Ankle Bracelets) pa asina tin miho bista ariba movecion di ex-detenido. Si e proyecto wordo realisa, e banchinan lo por wordo usa eventualmente tambe pa monitorea hobennan cu mester supervision, pero no mester necesariamente bay prison.

Na Voogdijraad e proceso pa haci e departamento mas eficiente pa por duna e miho servicio ta andando. Un sondeo a wordo haci pa determina kiko e retonan di Voogdijraad ta y a resulta cu modernisacion di e sistemanan di computer y telefon tabata esencial. Esaki, como tambe e espacionan extra pa reuni cu cliente, ta kedando cla.

Minister Dowers a splica cu na KIA entre otro e opleidingnan tabata pega y tabatin mester di un reorganisacion completo, cual tambe ta tumando luga, incluyendo e parti di programanan di rehabilitacion pa e presonan, cual practicamente no tabata existi mas.

Cuerpo Policial tambe a conoce avance: a recluta 80 polis mas, a atrae polis di exterior pa bin traha na Aruba y a pidi polisnan cu mester a baha cu pensioen pa keda traha algun tempo mas.

E mandatario a comenta cu ta  trahando ariba miho cooperacion entre diferente departamento y ministerionan pa traha mas den “keten” pa detecta menasanan y retonan prome cu nan pasa. Asina lo por evita cu hobennan keda den un ambiente cu tin influencia negativo ariba nan futuro y por conduci na un bida di crimen.

Cu e reorganisacion di departamentonan cu ta resorta bao di Ministerio di Husticia, dia prome di maart lo tin cambio na Instituto di Alarma y Siguridad Aruba (IASA) y Korps Politie Aruba (KPA).

Minister di Husticia y Enseñansa, sr. Arthur Dowers a splica cu pa dia prome di maart, 2012 Warda Nos Costa ta bira parti di Cuerpo Policial y un otro grupo di empleado di IASA ta bay traha na Cuerpo Especial Arubano.

Ora e departamentonan aki separa di IASA, Imigracion lo keda para indepediente di e otro departmantonan y ya e Ministeriele Beschikking ta cla pa forma un comision pa traha ariba diferente topico importante pa Imigracion y e trahadonan di Imigracion.

Ministerio di Husticia ta conta cu cooperacion di e sindicato TOPA, cu a expresa nan boluntad pa participa activo den e comision cu lo bay traha ariba e structura nobo pa Imigracion y tambe lo atende cu topiconan manera risico pa siguridad y calidad di servicio, entre otro.

Minister Dowers a expresa cu e ta hopi satisfecho cu e cooperacion entre Ministerio di Husticia cu tur sindicatonan cu ta representa empleadonan cu ta traha na departamentonan cu ta cay bao responsabilidad di Ministerio di Husticia y Ministerio di Enseñansa.

E bon cooperacion di tur partner ta esencial pa procesonan y proyectonan por wordo realisa y pa nan por wordo desaroya manera mester ta.