Diamars mainta, personal di Inmigracion a cuminsa cu e curso nobo cu ta forma un parti importante di e desaroyo di nan carera. Minister di Husticia y Enseñansa, mr. drs. Arthur Dowers tabata presente pa desea nan hopi exito y encurasha nan pa sigui padilanti, trahando na bienestar general di nos comunidad.

Minister Dowers a comenta cu pa crea e curso aki a tuma su tempo y tabata bezig na diferente departamento na mes momento, entre otro KIA, Polis, Brandweer y Inmigracion. A tuma mas largo cu a desea pa cuminsa cu e curso aki y ta trahando ariba otro alternativo pa evita problema den futuro, e mandatario a bisa.

“Esaki ta e futuro nobo di boso carera,” sr. Dowers a enfatisa, añadiendo cu den futuro e agentenan mester por cana nan carera sin mucho problema despues di e cambionan cu ta den proceso awo.

Minister Dowers a splica cu ta trahando pa establece un bon curso basico amplio pa asina e agente di Inmigracion nobo ta bon prepara pa e cuminsamento di su carera te na e punto cu e kier y ta cla pa asumi un posicion den “middenkader” of “kader” pa cual si e lo mester sigui un otro curso. Esaki lo evita y elimina tur e discusionnan cu tin encuanto ken tin of no tin derecho ariba bevordering, por ehempel.

Functionerings y beoordelingsgesprekken ta bira un parti structural di e maneho di e organisacion, Minister Dowers a bisa. El a splica cu durante e curso e agentenan lo ricibi instrumentonan cu lo yuda den conduci un functioneringsgesprek, entre otro cu lo yuda nan expresa nan mes tocante cosnan cu ta stroba nan den nan funcionamento. E instrumentonan aki ta forma e base pa funcionamento personal optimal, e minister a bisa.

Minister Dowers a conclui deseando e cursistanan hopi exito, un desaroyo mas trankilo di nan carera pa nan por sigui padilanti cu mas conocemento y mas animo

Poco poco nos ta cumpliendo cu e deseonan cu tabatin hopi aña den enseñansa, Minister Arthur Dowers a bisa dialuna mainta durante su bishita na La Salle College y Dominicus College. Esakinan ta dos proyecto mas cu ta wordo realisa den cuadro di e maneho di Ministerio di Husticia y Enseñansa, e mandatario a añadi.

Minister Dowers a referi no solamente na renobacion di nos scolnan, pero tambe na e realisacion di trece maneho pa reduci scolnan y klasnan. E minister a menciona cu e realisacion di un HAVO/MAVO na Noord sigur lo yuda tambe na yega e meta aki. Tanten cu ta trahando ariba e proyecto aki di nieuwbouw, ta hisando tambe e calidad di infrastructura di e scolnan existente.

Hopi scol na Aruba tabata den un condicion decai y no acceptabel y den apenas dos aña y mey ya a nota hopi cambio na scolnan rond Aruba.

Na La Salle College por ehempel a kita e trailernan cu tabata den un condicion sumamente tristo y nan no lo wordo poni bek, sr. Dowers a bisa. Tambe a expande e facilidadnan di e scol cu un gymzaal y bañonan bunita unda cu ta safe y placentero pa duna y tuma les.

A tene cuenta cu hopi aspecto tambe den e bario di Companashi mes. Por ehempel ora e contratistanan a cuminda kibra e cura, hendenan a cuminsa yama bisa cu e cura ey ta hopi special, tin hopi recuerdo vincula cu e cura di La Salle. Ken cu pasa wak e cura awo ta constata cu el a wordo drecha bunita, den mesun estilo cu e tabatin y ta gusta e trabao cu a wordo haci na La Salle.

Sr. Dowers ta bisa cu como a scoge pa dos contratista traha ariba e proyectonan por wak cu casi tin manera un competencia di cua ta traha mas lihe. Dominicus College ta casi cla y e por habri bek pa e muchanan y maestronan por cuminsa e aña escolar nobo den e edificio cu colornan alegre y gezellig. Pa loke ta trata La Salle College, e trabao ta bayendo lihe y ta spera cu si nan no por muda bek prome cu e aña escolar nobo cuminsa, nan lo por muda bek no mucho tempo despues.

Minister Arthur Dowers a expresa cu e ta sumamente contento cu e progreso cu el a wak na La Salle y Dominicus College. La Salle y Dominicus College ta joynan di scol meymey di e bario di Companashi y ta yuda realsa e calidad di bida den e bario aki, sr. Dowers a comenta. El a añadi cu e ta haya hopi comentario positivo encuanto e dos scolnan, mas ainda awo cu nan ta biniendo cla.

Minister Dowers ta gradici tur hende envolvi pa nan trabaoo duro y pa nan cooperacion, pasenshi y comprencion y particularmente e maestronan como tambe e mayornan, ken mester a haci cambio den nan schedule pa acomoda e transportacion di nan yiunan, etc.

E edificio di Corte di Husticia di Aruba tin basta tempo bao restauracion, renobacion y expansion. Durante e proceso, esnan liderando e proyecto a haya nan mes confronta cu cierto aspectonan historico inespera cu mester a tene cuenta cun’e, entre otro un pos y parti di fundeshi masha bieu. Esaki a causa cu e trabaonan a tarda mas largo cu a spera y a haya solucionnan con pa incorpora e aspectonan historico aki den e restauracion. Awo e trabaonan ta avansando lihe y di acuerdo cu e programa di trabao nobo, Minister di Husticia y Enseñansa, mr. drs. Arthur Dowers a anuncia dialuna mainta cu e edificio lo keda cla na october. Esaki kiermen cu Corte di Husticia lo por wordo uza pa atende casonan aki pa cuminsamento di 2013.

Sr. Dowers ta considera e edificio di Corte di Husticia uno cu ta yuda realsa e centro di ciudad y, particularmente, e area pa esnan cu ta biba y haci negoshi den bicindario di e edificio aki.

Despues di un recorido di e edifio, Minister Dowers a expresa cu e ta hopi satisfecho cu e trabao di e team encarga consistiendo di Monumenten Bureau, Van Kessel Construction y Arkitecto Hoevertsz. E minister a haya un bista y splicacion prome di e plannan. E edificio tin tres piso y lo tin seccionnan separa pa casonan civil y casonan penal, lo tin un biblioteca, oficinanan pa e personal di corte y wachtkamer, entre otro. E reorganisacion y expansion di e edificio tabata hopi necesario, considerando cu awendia tin mas caso ta wordo trata na Aruba y ademas tin mas caso criminal tambe ta wordo trata y tabatin mester di celnan y siguridad adecua, etc. den e edificio.

E aspecto di siguridad tanto pa esnan cu ta traha na corte como pa esnan cu ta bishita corte ta algo cu Minister Dowers ta pone hopi enfasis ariba y duna hopi atencion. E ta splica cu esaki ta un di aspectonan mas importante di e trabao cu a tuma luga y a tene cuenta cu tur factor, di siguridad pa candela, como siguridad personal.

Un di e metanan principal pa cu e trabao di restauracion, renobacion y expansion di e edifcio di Corte di Husticia na Playa ta pa garantisa un siguridad optimal di e organisacion y su “outline-nan”, Minister Dowers a comenta. Un otro meta hopi importante tabata pa provee servicio ultramoderno, teniendo na cuenta tur aspecto necesario pa procesonan funciona optimal.

E edificio ta cumpli cu e responsabilidad cu a wordo palabra den un rijkswet ora cu e situacion di e islanan di caribe hulandes a cambia. Pa loke ta trata husticia y mehoracion di calidad di husticia na Aruba, Aruba ta cumpliendo cabalmente. A keda palabra cu Aruba lo percura pa un facilidad adecua, pues e edificio ta keda di gobierno di Aruba, pero ta wordo poni na disposicion di Corte di Husticia.

Colegio San Antonio na Santa Cruz ta un MAVO school cu ta brinda enseñansa diaramente na 400 hoben. E edificionan di e scol aki ta mas cu 50 aña bieu y segun e cabesante, sr. Mario Tromp ta conta, e scol nunca a haya un renobacion completo. Pa acomoda tur studiante, e scol awo tin adicional na e 5 noodlokaalnan datando di 4 decada pasa, tambe 5 trailer ariba e tereno.

Diaranson mainta Minister di Husticia y Enseñansa Arthur Dowers a bishita e scol y a anuncia cu e scol a yega na turno pa cuminsa prepara pa un renobacion bon mereci. E atmosfera na un scol ta hopi importante pa e hoben, como tambe e maestro, Minister Dowers a comenta. E ambiente mester ta limpi, placentero, motivante y sigur.

Aunke Colegio San Antonio no ta mustra asina malo di pafo pasobra tanto e maestronan como e alumnonan y nan mayornan a logra mantene e edificionnan decente, e infrastructura tin algun reto basta serio. Minister Dowers a menciona cu entre otro e 5 noodlokaalnan y e 5 trailernancu mester wordo reemplasa, como tambe e dak cu a zak na diferente luga.

Sr. Tromp a comenta cu el a keda hopi contento cu bishita di sr. Dowers y e bon noticia cu e mandatario a trece pa nan scol. Colegio San Antonio ta den basta bon condicion, sigur si compar’e cu algun otro scol, pero esey no nifica cu no a yega e momento pa dun’e un renobacion manera mester ta, sr. Tromp a comenta. El a expresa cu entre otro e scol nunca tabatin un entrada bunita, e 5 noodlokaalnan ta mas di 40 aña bieu y ademas tin 5 trailer cu tambe mester wordo reemplasa pa edificionan di beton.

Minister Dowers a bisa un team cu ta traha ariba e renobacion di scolnan hunto cu un arquitecto lo tabata bishitando e scol mas laat den dia diahuebs. E team aki a cuminsa cu e proceso di analisa e situacion actual pa por cuminsa traha ariba e plannan y cu e proceso pa yega na e renobacion di Colegio San Antonio.

Desde final di 2009 ora cu mr. drs. Arthur Dowers a huramenta como minister di husticia y enseñansa pa e luna di mei di 2012 ya caba inverti mas of menos 24 miyon florin a wordo inverti den renobacion y restauracion di edificionnan di scol na Aruba.

Minister Dowers a comenta cu Pariba di Brug ya a inverti mas di 6 miyon florin y Pabao di Brug, unda tin mas scol como tambe scolnan mas grandi, e inversionnan ta sumando den careda di 18 miyon florin.

E mandatario a comenta cu e forma cu ta wordo traha ta cu bista ariba futuro, pa crea un alivio di plaso largo cu bon mantencion pa asina por disminui e sumanan inverti den infrastructura y por sigui incrementa e placa cu ta wordo inverti den e contenido di enseñansa.

Minister Arthur Dowers ta determina pa tur mucha y maestro por disfruta di luganan sigur, placentero y motivante pa tuma y duna les, como tambe unda mayornan ta sinti nan mes trankilo y confia di hiba nan yiunan diaramente pa nan educacion.

Minister Dowers a expresa cu den e periodo di gobernacion 2009-2013 tanto e infrastructura como enseñansa en general ta hayando e atencion debido cu pa hopi aña no a wordo brinda na e futuro di nos yiunan.

E team di Minister Dowers ta trahando duro hunto cu e mandatario, determina di completa un gran parti di e lista largo di renobacionnan necesario na scolnan rond Aruba. “Mester trece e infrastructura di nos scolnan na un nivel acceptabel bek,” sr. Dowers a comenta, añadiendo cu hopi trabao ya a tuma luga y cu e aña aki como tambe otro aña tin basta trabao ainda pa haci.

Diaranson merdia Minister Arthur Dowers a bishita Abraham de Veerschool pa wak con e trabaonan di renobacion ta avansando. E scol cu tabata den un estado deplorabel, ta hayando un renobacion completo. Temporalmente e scol a wordo reubica den e edificio cu antes tabata Prinses Christina School.

Minister Dowers ta siguiendo e proceso di renobacion di cerca y e biaha aki a topa cu representantenan di contratista Van den Broek na e sitio. E mandatario a expresa cu e ta sumamente satisfecho cu e adelantonan cu el a wak y tambe e ta hopi satisfecho cu e excelente cooperacion di parti di e contratista. El a describi e ambiente di trabao como uno sumamente positivo, unda cu e contratista ta hopi habri “pa discuti nos pensamentonan y haci cambionan necesario.”

Esaki ta un proyecto hopi importante pa educacion na Pais Aruba y particularmente pa e hobennan di San Nicolas, Minister Dowers a expresa. Abraham de Veerschool ta cumpliendo 60 aña y den pasado a conoce un renobacion cu no tabata di e miho calidad. Pero awo, como regalo pa e scol publico aki su di 60 aniversario, ta spera di por muda e scol bek den su edificio bunita y bon renoba asina cu e trabaonan ta cla.

Sr. Dowers a bisa cu e renobacion aki mester, combina cu bon mantencion, garantisa cu pa hopi aña e scol lo keda den condicion optimal y cumpli cu e proposito di brinda educacion na un nivel halto.

Minister Dowers a comenta cu Sint Augustinus College tambe ta ariba lista pa un renobacion grandi, John Wesley College tin mester di un renobacion menos grandi y Sint Michael School na Brazil ta den preparacion pa wordo renoba tambe.

Desde final di 2009, ora cu sr. Dowers a asumi e puesto di Minister di Husticia y Enseñansa, ya caba mas di 6 miyon florin a wordo inverti den infrastructura di scolnan na San Nicolas, entre otro den e renobacion grandi di Abraham de Veerschool, e renobacion di Prinses Christina School y pa porta y bentana nobo, como tambe verf paden y pafo na Santa Teresita y Santa Filomena.