Minister di Husticia y Enseñansa ta lesa buki cu muchanan di 3a y 3b di scol basico Pius X
November 3rd, 2011 at 22:54
Diahuebs scol basico Puis X tabata escena di un reunion di heroenan simbolico, personanan den nos comunidad cu muchanan conoce y ta reconoce. Ruben Garcia, Tio George y Tanchi Esmee, autor Desiree Correa, Parlamentarionan Paul Croes, Marisol Lopez-Tromp y Marlon Sneek y tambe Minister di Husticia y Enseñansa, Arthur Dowers y miembro di directiva di SIMAR Juffrouw Maroushka Cornelie a wordo invita cana drenta e scol hunto cu e Streanan di Luna. E comision di recepcion tabata consisti di dos rij di mucha hopi anima, cu bon beis y yen di energia. Tabata hopi leuk pa tende ora nan ex-cabesante, sr. Eric Rincones a yega scol con duro e muchanan a grita y bati man p’e.
E titulo di Strea di Luna ta un reconocimento cu ta wordo duna cada luna na muchanan cu ta haci un contribucion special y positivo na e scol y bida na scol.
E team di Pius X a scoge pa invita diferente personalidadnan di e comunidad Arubiano, algun di nan cu un relacion special cu nan scol y e bario di Dakota. Minister Dowers mes tambe a bay scol na Dakota, entre otro na Pius X.
Un di e muchanan di scol a canta e cantica cu a wordo introduci e aña aki como e himno di Kinderboekenweek, cual tin como tema Mi buki ta mi Heroe. Cabesante Juffrouw Sheila Laso a hiba palabra y a gradici tur heroe presente pa nan entusiasmo y a deseanan un dushi mainta den compania di e muchanan.
Cada heroe a cana bay den klas cu e muchanan y nan maestro. Minister Dowers a bay den klas 3, unda nan a ricibi’e cu un stoel decora cu su nomber ariba y e muchanan di klas 3a y 3b a canta e cantica di Kinderboekenweek p’e.
Despues di esaki Minister Dowers a lesa buki pa e muchanan. Rato rato, ora e tabata topa un palabra dificil e mandatario tabata stop y puntra e muchanan si nan sa kiko e palabra kiermen. E muchanan a disfruta di un storia hopi leuk cu un bon mensahe di con pa comparti cu otro y amistad.
Minister a probecha di enfatisa e importancia di estudio, bon comportacion y lesamento ora cu e muchanan a puntr’e ta kiko un hende mester haci pa bira minister. Sr. Dowers a duna un splicacion y despues a puntra e muchanan “kiko bo kier bira ora bo bira grandi”. Mayoria di e muchanan a expresa cu nan kier bira maestro di scol y polis, tabatin mucha tambe cu kier bira militar y por lo menos un muchan muhe cu a contesta cu e ta bay bira doctor.
Tabata un mainta hopi ameno y minister a disfruta hopi di e intercambio cu e muchanan.
Na final di e les special cu minister, e muchanan a sorprende minister cu un bunita “boekenlegger” cu nan potret como recuerdo