Tin dos politico cu ta parse cu tin un competencia pa wak ken ta gaña mas, Minister Dowers a bisa. El a indica cu di e dos politiconan, esun masculino ta sr. Rudy Lampe di partido RED. E titular di husticia y enseñansa tabata referi na sr. Lampe su declaracionnan mas recien na prensa encuanto e politico su solicitud na Universidad di Aruba.

Tendencioso y hasta discriminatorio, sr. Arthur Dowers a denomina e ponencianan di sr. Rudy Lampe cu a bisa cu e minister lo a blokea sr. Lampe su nombramento na Universidad di Aruba. Sr. Lampe a bisa cu esaki a tuma luga na dos ocasion, unda cu e minister lo a dicidi di nombra hulandesnan na luga di dje. Sr. Dowers a aclarea cu e no a ricibi sr. Lampe su solicitudnan y pues pa sr. Lampe bisa cu el a prefera di duna e puestonan habri na dos hulandes ta infunda.

E minister di husticia y enseñansa a bisa cu ora el a tende di sr. Lampe su remarcanan, el a tuma contacto cu Universidad pa puntra ta ki solicitud sr. Lampe lo ta refiriendo na dje.

“Cerca mi ningun papel di dje no a yega,” Minister Dowers a bisa. E minister a splica cu ademas no ta e ta dicidi ariba nombracion, e ta ricibi un “voordracht” di Universidad despues cu nan a haci nan seleccion di acuerdo cu nan criteria. “Ami no ta dicidi, ami ta bekrachtig” un nombracion, sr. Dowers a enfatisa.