Siman pasa Minister Arthur Dowers y tres miembro di su team a bishita Colegio Arubano na San Nicolas, unda nan a tuma un tour, combersa cu alumnonan y intercambia di idea cu e maestro cu ta encarga cu e scol, sr. Johnny Fingal.

Ta di basta tempo caba cu Minister di Husticia y Enseñansa, mr. drs. Arthur Dowers ta expresando cu awor ta e momento pa expande e departamento di HAVO na San Nicolas pa inclui tambe e asina yama Bovenbouw, cual ta HAVO 4 y 5. Esaki ta un iniciativa cu hopi mayor a pidi p’e y ta para su tras. Pero tambe e alumnonan di Colegio pariba semper a boga pa esaki ya cu entre otro e  oportunidad aki lo yuda corta nan tempo di transportacion.

E proceso aki ta cuminsa cana su caminda y ta spera cu pa e proximo aña escolar e proyecto aki wordo realisa pa por brinda Colegianonan di HAVO pariba di brug nan HAVO 4 y Examenklas na San Nicolas mes.