Dialuna anochi directiva di YMCA y docentenan di e curso di cushinamento cu a yega su final recientemente a celebra e entrega di e certificadonan na e cursistanan. Minister di Husticia y Enseñansa, sr. Arthur Dowers a wordo invita pa haci entrega di e certificadonan.

Tabata prome biaha cu e mandatario a wak e cushina di YMCA y el a felicita e centro cu e bunita facilidad y a añadi cu ta un placer pa e participa na e ceremonia y celebracion di e cabamento di e curso.
Minister Dowers a comenta cu e ta hopi satisfecho di wak cu un institucion manera YMCA, cu tin un tradicion largo den dunamento di e tipo di cursonan aki, ta sigui ofrece e opcionnan aki na e comunidad di Aruba. Ministerio di Enseñansa kier stimula mas tanto e posibilidad pa tin cursonan na tur nivel pa e comunidad y e mandatario a encurasha YMCA pa den e aña cu ta bin nan sigui organisa mas curso y motiva mas cursista pa participa.

E minister a conseha hobennan pa nan tambe inscribi pa e cursonan aki y probecha pa siña sierto tecnicanan cu profesionalnan ta usa den cushina. Awendia cu famianan ta hopi druk cu trabao, hopi biaha ta lubida di desaroya e talentonan practico manera cushinamento cerca e hobennan y cursonan manera esunnan di YMCA ta yuda e hoben siña con pa cushina y ademas tambe con pa come saludabel.

Minister Dowers a felicita e cursistanan como tambe e docentenan cu nan bon trabao y e platonan cu nan a presenta dialuna anochi pa demonstra y comparti nan abilidadnan y talento culinario cu esnan presente.