Asunto di adicto ta cay awo bao minister Arthur Dowers

Dia di huramentacion mes el a firma yen di documento y asina ta sigui e siman aki caba. Despues di reunion di ministerraad e lo yama tur su departamentonan pa cuminsa planea mirando cu tin hopi cos ta bai ta pasando den e dianan cu ta sigui. E trabao di husticia nunca ta bira menos pero como cu nan ta trahando riba un fundeshi hopi solido den enseñanza y husticia, awor cu e no tin e cartera di enseñanza e trabaonan ta bai ta hopi mas trankil, mehor organiza y lo logra cosnan importante tambe entre otro e centro pa nos hobennan cu ta crea problema den nos sociedad.  Minister Dowers a bisa cu trabao tin na cantidad y fin di aña ta na caminda, y esaki ta e temporada cu tin hende ta haci cos for di sla pa haya placa pa celebra nan Pasco, y trafico tambe ta importante y esaki ta cosnan cu lo haya atencion adicional e dianan aki. El a splica cu aña lo habri cu cierto proyectonan nobo of cu ta cuminsa nan prome fase, y lo mira mas polis riba caya y mas control. A pidi su persona pa atende cu asunto di adicto y e ta un persona cu den pasado a traha den salubridad publico y a trata e aspecto di adicto y a haci un apelacion riba su persona pa atende cu esaki y e lo haci esaki. E ta spera cu pronto e ta bai reuni pa combersa cu tur esnan envolvi den e tereno aki pa asina aki nan por traha e plan di atake contra e problema di adiccion cu tog, tur hende den comunidad tin di haber cune.