Mi kier wak nos muchanan safe na Traimerdia y no na trapi di Husticia”

Durante un celebracion ameno den e edifico precioso di Traimerdia, Minister Arthur Dowers, hunto cu e directora sra Miranda Bareño a haci entrega di diploma na seis graduado di e curso interno pa leidster na Traimerdia. Prome cu e sra Bareño a haci e entrega oficial di diploma, el a tuma un rato pa tuma despedida di Minister Dowers como minister di Enseñansa. Traimerdia por mira atras riba cuatro aña di tremendo cooperacion di parti di  minister di husticia y enseñansa  y nan directora.  Tabatin solamente palabranan di elogio pa e mandatario.  El a expresa su gratitud den palabranan bunita y kier a pone e minister “in het zonnetje” un rato ya cu tabata delaster dia cu e mandatario lo ta nan minister di enseñansa. El a bisa di ta masha contento y agradecido pa asina hopi cos cu nan minister a logra pa nan. Entre otro minister Dowers a drecha posicion huridico di 45 persona, algo cu niun hende a pensa cu tabata posibel. Minister Dowers a aporta na cursonan di ‘upgrading’ unda cu a crea mas profesionalismo di modo cu mas hende por a haya nan bevordering. Minister a habri tambe un Centro nobo na Sabana Basora y na mes momento el a acorda e funcion di Centrumhoofd. “Nos ta drentando un era nobo di calidad pa nos Traimerdianan, “ asina e directora a reitera.  “Minister Dowers ta kere den Conscious Discipline” y el a sigui yuda nos pa expande e liña pedagogico aki. Conscious Discipline ta un educacion conciente cu ta locual nos ta eherciendo den nos Traimerdianan pa nos muchanan,” asina e directora a sigui bisa. Tambe e edificio luhoso cu nan ta aden ta danki na minister Arthur Dowers. Sra. Bareño tabata yen di elogio pa e graduadonan bisando cu nan merece un pabien masha grandi mes ya cu nan a persevera pa dos aña largo. “Di e grupo  cu a start, seis a resta. Boso a traha duro, bin les pa dos aña largo, haci huiswerk y keda duna di boso parti, locual ta nos meta crucial pa nos muchanan na Traimerdia,” Sra.Bareño a duna di conoce.