Minister di Husticia ta lamenta accion innecesario na KIA cu a pone bida di hende na peliger

 

 Mientras cu minister di husticia Arthur Dowers tabata cu biahe di trabou na Merca, bishitando algun prizon, e mandatario a wordo informa di e paro di trabou cu a tuma luga na KIA. Ta un situacion di lamenta segun e mandatario ora cu personal ta welga sin base. E accion aki apesar di a costa pais Aruba riba shen mil florin na gasto a pone bida di coleganan na peliger. E welga orkestra pa sindicato TOPA a bin di sorpresa y tabata completamente innecesario ya cu no tabata tin ningun conflicto laboral, no tabata tin ningun problema entre sindicato y dunado di trabou y mas ainda no tabata tin ningun peticion concreto di sindicato.
E diabierna prome cu a paro di trabou ainda tabata  tin combersacion cu e sindicato caminda a indica cu cosnan ta canando y lamentablemente, apesar cu e sindicato tabata na haltura cu e asuntonan di personal ta canando, a dicidi sin avisa di pone trabou abou. Minister Dowers ta bisa cu e ta respeta e derecho di cada trahado pa protesta, pero cu tin proceso cu ta determina bou di ki situacion trahadonan por protesta y sali bandona pia di trabou. Na varios ocasion personanan cu ta carga un responsabilidad specifico pa loke ta siguridad y/of bida di hende ta bay den protesta, pero na momento di haci esaki ta hasi’e di un forma responsabel, teniendo cuenta cu siguridad di esunnan cu ta wordo yama pa protege bida di hende. Den e caso di e welga dia dialuna esaki no a tuma luga.
E accion aki ta di lamenta profundamente, principalmente si  mira cu despues cu TOPA a reuni cu P&O y ministerio di Husticia e diaranson despues di e welga, a nota claramente cu no tabata tin ningun rason pa tene e protesta aki.
E realidad di e situacion ta cu tin un grupo di personal di KIA cu nan bevordering a tarda. For di inicio a informa e sindicato y e personanan en cuestion cu e bevordering lo tarda comokiera cu pa añas  e gobierno anterior no a traha riba e bevordering di e trahadonan cu e consecuencia cu tin un stagnacion sumamente grandi na KIA. Bou di mandato anterior e personal di KIA no a ricibi e opleiding necesario pa nan por haña nan bevordering. Na momento cu a cambia di gobierno y cu minister Dowers a tuma e cartera di husticia mester a skirbi e opleiding di nobo. E proceso aki a tuma su tempo ya cu e no ta algo cu den un par di dia por pone riba papel. Despues a pone hendenan adicional den KIA pa percura pa e landsbesluitnan cana nan caminda. E proceso aki ta uno complica pero a sigura e personal na KIA y e sindicato cu e proceso di regla bevordering lo termina aproximadamente den juni 2014.
Segun e mandatario e sindicato a laga sa cu ta pa motibo cu e rechtspositieregeling di e personal no ta regla nan a bay protesta. Riba esaki e mandatario ta reacciona bisando cu tur hende a haña loke nan tabata tin derecho riba dje conforme e reglanan stipula. Si apesar di esaki tog e sindicato ta di opinion cu ta necesario pa protesta mester a haci esaki den un forma responsabel. Ta inaceptabel cu ta orkestra un welga sin previo aviso, bandonando un prizon y lagando 2 dama so na pia di trabou pa cuida tur e presonan, poniendo e bida di e dos damanan aki na peliger. Ta di lamenta mas ainda cu tin algun politiconan ta cu maluza e situacion aki pa beneficio politico y hasta ta aproba e accion iresponsabel aki.

Minister Dowers Dowers a pidi reunion cu sindicato TOPA y ta sperando contesta ki dia e sindicato por sinta na mesa. Tambe lo inicia un investigacion profundo riba tur loke a tuma luga prome y durante e welga pa asina yega na bon palabracionnan pa futuro. E situacion aki a pone bida di por lo menos dos hende na peliger y a crea consecuencia sumamente negativo riba e relacion di trabou den e institucion comokiera cu tin varios personal cu a sinti cu nan bida a wordo poni na peliger innecesariamente