Minister di husticia Arthur Dowers a haci un recorido den edificio renoba di corte

Diahuebs atardi minister di husticia Arhtur Dowers a haci un recorido cu e trahadonan di griffie den e edificio completamente renoba di corte di husticia.
E trahadonan,kendenan por cierto algun di nan a traha den e edificio practicamente henter nan bida profesional, a haya e oportunidad pa nan por wak con nan luga di trabou a keda despues di a wordo remodela, net prome cu esaki wordo entrega na Hof van Justitie.  E edificio nobo di corte a wordo recientemente expande y remodela y pa e trahadonan e tabata un experiencia positivo pa cana den e edificio y rebiba recuerdonan di hopi aña pasa. Señora Lica Brion a comenta “mi a traha 41 aña den e edificio aki; e edificio a keda simplemente bunita”. Despues di un periodo largo di remodelacion e edificio porfin a keda cla y e ta sigur un hoya di un edificio cu tecnologia  sumamente moderno y di un calidad hopi halto. Deniris Marques, trahado di griffie pa hopi aña ta bisa cu  “e luga a keda fantastico, hopi cambio pero hopi bunita mes” y un cara masha conoci na griffie ta esun di señora Claudette Margareta kende ta comenta hopi emociona cu “Mi ta hopi impresiona cu e edificio”.
Minister Dowers ta finalisa bisando cu e trahadonan aki a dedica hopi aña di nan bida na husticia di pais Aruba  y e ta contento cu practicamente tur cu a ricibi e invitacion pa pasa wak e edificio a haci uzo di e oportunidad tambe.