Concepto di Codigo di Procedemento Penal ta inclui mas proteccion pa victima

 

Diahuebs Minister di Husticia y Cuido di Adiccion, mr. Drs. Arthur Dowers a ricibi e concepto di e Codigo di Procedemento Penal  (Wetboek van Strafvordering) nobo for di representante di un comision cu a traha pa cinco aña riba e concepto di ley aki, Hans de Doelder. 

E ultimo aki ta hoogleraar strafrecht y strafvordering na Erasmus Universiteit na Rotterdam, tabata miembro tambe di e comision cu a traha pa riba e concepto pa e Wetboek van Strafrecht nobo, cual a wordo aproba algun tempo pasa den Parlamento.

E Codigo di Procedemento Legal nobo a wordo skirbi teniendo na cuenta e tratadonan internacional aplicabel na Aruba y e otro cinco teritorionan Caribense di Reino Hulandes. E Codigo di Procedemento Legal actual no ta coresponde mas na e tratadonan internacional, Den Doelder a comenta. E ley aki ta wordo discuti na cada isla y entre e islanan. Den Doelder a splica cu a tene cuenta di un banda cu e tratadonan internacional di derecho di hende y di otro banda cu tratadonan cu tin di haci cu proteccion di testigo, deteccion, etc.

E comision cu a traha na Aruba riba e concepto aki a consisti di representantenan di diferente grupo di interes den e ramo di ley, manera Cuerpo Policial, abogacia, Universidad di Aruba, y mucho mas. E Codigo di Procedemento Legal comun ta haci mas facil pa abogado y polis di e diferente islanan por traha hunto, como tambe haci mas eficiente e trabao di Gemeenschappelijk Hof (Corte Comun) y esun di Hoge Raad na Hulanda, Den Doelder a añadi.

Minister Dowers a bisa cu esaki ta un ley hopi importante pa e funcionamento di henter e sistema hudicial. Durante e ultimo añanan aki a dedica hopi atencion na e derecho di e sospechoso y esey a trece cu a haya un codigo penal cu por bisa a complica e posicion di husticia pa por atende cu crimen, segun e mandatario.

Minister Dowers a splica cu despues di 9/11 a bin un presion grandi riba crimen internacional y e codigo nobo ta tene cuenta cu e derecho di sospechoso, pero tambe ta regla otro aspectonan cu ta importante, manera e derechonan di e victima. “E victima ta pasa hopi, ta sufri hopi bao di e crimen y mi ta sinti pa hopi aña no a tene suficiente cuenta cu su derechonan,” Minister Arthur Dowers a subraya, añadiendo cu e codigo nobo ta provee derechonan adicional tanto pa e victima como pa Ministerio Publico por proteha e derecho di e victima.

E mandatario a menciona cu entre otro e codigo nobo lo haci posibel pa Ministerio Publico tuma pertenencianan di e persona(nan) cu a comete e crimen den beslag pa provee compensacion pa e victima(nan). “Esey pa mi ta un adelanto grandi, pasobra tabatin mucho poco atencion pa e victima,” Minister Dowers a expresa.

Den e caso di Codigo di Procedemento nobo, tambe entre otro a tene cuenta – mescos cu a haci den caso di e BOB-wet nobo -  cu avancenan tecnologico y desaroyo di crimen nan nobo y a inclui e posibilidad pa pone beslag riba “data” (informacion). Minister Arthur Dowers a splica cu modernisacion di codigo penal - cual a conoce aprobacion algun tempo pasa y lo bay na vigor na 2014 - y leynan, principalmente e Codigo di Procedemento, ta necesario pa cumpli cu standard internacional.

E concepto di ley nobo mester pasa awo via di departamento di “Wetgeving” y Raad van Advies pa despues wordo presenta na Parlamento pa evaluacion y aprobacion