Minister Arthur Dowers ta gradici team di Traimerdia

Minister Dowers a tuma despedida di su team di Traimerdia y a gradici nan sinceramente pa cuatro aña di bon trabou. “Tabata un placer pa a traha cu boso. Mi kier a laga henter e parti di despedida bay mas suave, pero aki mi mester a bin pa despedi prome cu mi “zwaai af” como Minister di Enseñansa,” asina e mandatario a laga sa. El a elogia e team di Traimerdia pa e cooperacion cu semper el a experencia cu nan y a expresa su satisfaccion cu, cu esfuerso di hopi hende, e por a logra cumpli cu nan deseonan.  “Boso a haya loke a wordo priminti y loke boso merece y awe nos tin un organisacion cu ta funciona sumamente profesional, cu un contribucion grandi na formacion y educacion di nos muchanan,” asina minister Dowers a bisa. Pa loke ta su cartera di enseñansa, e ta laga esaki atras cu sentimentonan positivo y e ta contento pa wak e resultado den enseñansa.  El a despedi di Traimerdia bisando cu nan lo sigui traha hunto riba tereno di Husticia pasobra Traimerdia por haci un contribucion importante den formacion y educacion di nos hobennan cu ta haya nan mes den problemanan social of cu husticia. E trainingnan di entre otro Conscious Discipline cu e personal a haya lo aporta grandemente na esaki.  No solamente como minister di husticia, sino mas ainda como ciudadano den nos comunidad, ta haci dolor pa mira muchanan hoben haya nan mes den problema cu husticia. Traimerdia por aporta grandemente hunto cu su ministerio, na yuda soluciona e problematica aki. E mandatario a felicita Traimerdia pa su logro y a desea nan hopi exito pa futuro. “Nos lo keda traha cu otro pa loke ta parti di seguridad di nos comunidad y e parti di prevencion. Mi ta cerca na momento cu mester sostene boso,” el a priminti.