Minister Arthur Dowers a reuni cu hefenan di departamentonan di Husticia

Aruba - 19 di november 2013: Minister di Husticia mr. drs. Arthur Dowers a reuni diamars cu tur hefe di e departamentonan cu  ta resorta bao di ministerio di husticia pa repasa y adapta e planning delinea den e rapport “Een solide basis”, cual a wordo traha mas of menos un aña pasa.

Asina ta logra pone un base solido pa e temporada di gobernacion nobo, cu puntonan di maneho y prioridadnan defini pa cu e maneho y funcionamento individual y integral di tur departamento.

Durante e reunion, cada departamento a haci un presentacion tocante nan plannan y factornan cu mester tene cuenta cu nan actualmente y pa futuro. Aki a identifica diferente problema, reto y areanan di trabao comun, unda cu lo discuti e topiconan aki mas den detaye pa asina haci palabracionnan unda un partner por contribui cu e otro pa yega na solucionnan of proyectonan hunto.

Lo defini priodadnan di cada departamento, como tambe e prioridadnan comun entre e departamentonan.

Particularmente e departamentonan cu ta traha of tin hopi contacto cu nos hobennan a indica cu tin retonan comun.

“Nan ta sinti cu mester bay haci mas na e aspect di siguridad,” Minister Dowers a bisa. Pa loke ta trata e personal, nan mester bay wordo prepara miho pa e tipo di persona cu nan ta hay nan mes ta anda cune awendia, e mandatario a splica, añadiendo cu cada anja tin un cambio pa loke ta trata e tolerancia, tambe a nota un aumento di personanan afecta pa droga y personanan cu malesanan psiciatrico.

Esaki ta retonan nobo pa husticia, pero tambe pa e ramo social, di enseñansa y di salubridad, e titular di husticia expresa.

Durante e periodo di gobernacion di Gabinete Mike Eman I, a haci un intento pa cuminsa pone e “link” entre e ministerionan na e ministerio di husticia y enseñansa, cual tabata cay bao maneho di Minister Dowers. E cuminsa cu introduccion di un plan di maneho integral pa atende cu personanan cu ta core risico den nos sociedad, e mandatario a splica.

“Nan no ta bira menos di nan mes; nan no ta bira menos tampoco door di papia. Bo tin cu atende cu e asunto aki y bo tin cu bay traha sumamente duro na tene, por ehempel droga, for di bo sociedad,” Minister Dowers a bisa. El a subraya cu e no ta kere cu e bataya contra droga ta un bataya perdi, y mester inverti den nos hubentud; mester inverti unda cu por pa preveni cu cosnan ta bay fout.

“Esey mi ta kere ta e parti grandi di e reto cu nos ta wordo confronta cune, no solamente den husticia, pero den henter e sociedad den e periodo nos dilanti,” Minister Dowers a conclui bisando.